Aizawl August 7, 2024: Health & Family Welfare Minister Lalrinpuii chuan vawiin khan Zoram Medical College (ZMC), din champhaphak vawi 6-na lawmna hun khuallian niin a hmanpui a, Crawford Gents' Hostel leh Hospital Management Information System (HMIS) a hawng nghal bawk.

Khuallian Lalrinpuii chuan ZMC-in a din champhaphak vawi 6-na tluang taka an thleng thei leh hemi ruala Crawford Gents' Hostel leh Hospital Management Information System hman theiha hawn a ni chu lawmawm a tih thu a sawiin, hmasawnna hrang hrang thlen tura bultantu leh theihtawp chhuahtute fakawm a tih thu a sawi. ZMC atanga pass chhuak zinga Doctor 39 te National Heath Mission hnuaia thawk tura lak nghal an ni, a ti a. Medical College tha nei turin hmunhma leh bungraw tha, zirtirtu fel leh rintlak bakah zirlai tha neih a pawimawh hmasak thu sawiin, ZMC ah Cardio-thorasic wing din turin State sawrkar-ah rawtna thlen a nih thu leh IVF Centre neih theih nan ruahmanna siam mek a nih thu a tarlang bawk.

He hunah hian Aizawl South-III bialtu, Khualzahawm Baryl Vanneihsangi chuan Zoram Medical College-in kum 6 hmel an hmu chu lawmawm a tih thu leh tun hun theng tura hmathlir thui tak neia he hmun lo buatsaihtute chu hriatreng an nih tawh tur thu leh thathawhtute hmalakna chhuanawm a tih thu a sawi. HMIS chuan ZMC thawktute leh pantute tan awlsamna leh remchang a siam ngei a beisei thu a sawi a. Bialtu MLA a nih angin ZMC tan a tulna apiangah theihtawp chhuah a inhuam thu a sawi bawk.

Crawford Gents' Hostel, Residential Hostel pahnih awmna hi NESIDS sum cheng vaibelchhe 10 senga sak a ni a, 24.10.2021 ah thawh tan niin, 24.10.2023 khan zawhfel a ni. Mizoram PWD in architectural & structural design an siam a. Zopa chhiara chhawng 6 niin, floor area zau zawng belhkhawm hi square metre 2518.57 a ni a. Single room 10, double room 37 leh khum 84 a awm a ni.

Hospital Management Information System (HMIS) hi National Health Mission hnuaia ECRP-2 project kentel a ni a. Nextgen eHospital portal kaltlangin Damdawiin hmalaknate khawl hmanga kalpui computerised tur a ni a, he project hi Mizorama District Hospital 11 ah kalpui tum a ni. QR Code hmangin OPD/Casualty inziakluh bakah appointment book leh cancel a tih theih a ni.

ZMC hi August ni 7, 2018 ah hawn niin NMC-in June ni 16, 2023 khan recognition a pe a. Khum 364 awm mekin tun dinhmunah zirlai 395, State chhung mi 288, State dang 48 leh NRI 59 an awm a. Faculty 112, Non Faculty Doctor 40 leh Non Teaching Staff 572 an awm mek a. Superspecialist leh Specialist hrang hrang Department 22 ah a awm a. Thisen Test chi hrang hrang, Ultrasound, CT Scan leh MRI te a tih theih a. Golden Card (AB-PMJAY), Health Care, ESIS, ECHS, RBSK, Dr. Ambedkar Scheme-ahte Empanelled Hospital niin OPD Pharmacy-ah a thlawnin damdawi sem thin a ni.