Aizawl: Zoram Medical College/ State Referral Hospital, Falkawn a Intensive Care Unit a khum awm zawng zawng chu Covid-19 vei te enkawlna atan dah vek tum a nih laiin CCC ah  damlote an la enkawl thei hrih nia thu dawn a ni.

ZALEN thudawn danin Zoram Medical College/ State Referral Hospital ah hian ICU khum 13 a awm mek a, heng zinga 6 hi Covid-19 vei damlo na zual te enkawlna atan dah bik a ni a, a dang 7 hi damlo dang tan dah an la ni hrih a ni. 

Mahse tunhnaiah Covid-19 hi a pun chhoh leh tak avangin leh ICU a enkawl tur an tam/pun zel chuan non-covid tana khum 7 ruahman hi covid-19 enkawlna atan hman leh rilruk mek a ni tih Health dept. thawk te chuan an sawi.

Hetih lai hian Health & Family Welfare Board vice chairman Dr. ZR Thiamsanga chuan Kohhran hoten hmunhma an neih that avangin Covid vei te enkawlna 'covid care centre' atan an hmunhma te an dil tih a sawi a. Tun dinhmunah chuan sawrkar chu covid care centre hrang hrangah a la inenkawl thei tih sawiin heng covid care centre ah hian mi 1000 chuang enkawlna tur hmun a awm niin a sawi bawk.

Zoram Medical College/ State Referral Hospital a ICU te hi ventilator awm vek niin an sawi a. Tun dinhmunah ZMC ICU ah hian damlo mi 4 enkawl mek an ni.