ZALEN July 24, 2023 : MSU District Headquarters, Kolasib buatsaih zirlai titha lawmpuina chu vawiin khan Diakkawn YMA Hall, Kolasib-ah neih a ni a, he hunah hian LAD Minister K. Lalrinliana chu khuallian niin MSU General Headquarters Vice President Laldinsanga chu Uaptu a ni.

Uaptu Laldinsanga chuan, "Mizo hnam peng hrang hrang te hi Zofate vek kan ni a, Zo hnahthlak bik tumah kan awm lo. Zofate tih thumal hi hmang tam deuh deuh a tul. Chu chuan, inpumkhatna kawng zawh a awl phah ang. Zo hnahthlak tih thuah hian thenkhat tan indah hran deuhna emaw dah hranna deuh hi a awm thin a, chu chuan Mizo a inpawmna min harsat tir," a ti. Inpui-a awm te chu Zofate tih hmang tam deuh deuh turin a chah a, hei hian Zofa te rilru hmun khat, Mizo-ah min hruai khawm vat a beisei thu a sawi.

Laldinsanga chuan, "Zofate chu hmun hrang hrangah then hranin awm mah ila, Pathianin Zofate thinlung hmun khatah min hruai khawm mek zel a, Zofate Inpui Mizoram-a cheng te pawhin Inpui nghaktu a nihna anga rilru zau tak leh puitling taka, hmun hrang hranga awm kan unaute kuahkhawm hna thawh a tul," a ti. 

MSU Vice President chuan zirlai kalkhawm te hmaah tum mumal tak nena zirna kalpui turin a chah a, zirlai tum mumal tak pawh nei lova Graduate an tam thin a ti a, chu chuan thalai hna hmu lo tam tak a hrinchhuah thin thu a sawi bawk.