July 6: Zemabawk Zokhawsanga a pawl pahnih intel khawm, Khuangzau Lui Zau Association leh Zokhawsang Farmer Society te chuan an eizawnna an hman kalkawng ber Asssam Rifles te'n kaltlang an phalsak tawh loh avangin naktuk ni 10, July atangin helai kawng hi dan an tum.

An thuchhuahin a tarlan danin helai ram hi Hectare 1592 a zau niin revenue pass 700 awmna a ni a. Chhungkaw 100 velin he lai kawng hi an eizawn nan an paltlang thin  a ni. 

Home Department, Assam Rifles leh Ministry of Home Affairs chuan video conferencing an neih naah Mizoram Department lam hian kawng siam peih vek thuin an chhang a. AR lam hian  an eizawnna kalkawng ber chu March atangin an dang ta a, indawr pawhin awmzia nei lo niin an thuchhuah intawm chuan a sawi a.

Vantlang kawng chu laih tlang tawh ni mahse hman hleih theih a la nih loh thu an tarlang bawk a. Kawng pangngai an hman thin hman phalsak emaw kawng thar zawk hman tlaka siam that a nih hma chu he kawng hi dan an tum thu an thuchhuah chuan a tarlang a ni.

ZOKHAWSANG RAMA KUT   HNATHAWKTU INTELKHAWMTE DEMAND:

1. Vantlang kawng tur sawrkarin a siam hi a hmantlak loh avangin kuthnathawktute duh dan leh hmantlak ngeiin vantlang kawng siam ni rawh se. 

2. Vantlang kawng kuthnathawktute duh dan anga siam a nih hma loh chuan; tun hma kan Pi leh Pute hunlai atanga kan kalkawng ber (Tlang Kawng) tuna Assam Rifles ten an dan tlat hi  tiam chin leh  phal chin awm lovin kuthnathawktuten zalen takin a lut leh chhuak lam hi lirthei leh kea kaltlang theih kan duh. 

3. Vantlang kawng tur Sawrkarin a siam hi a hmantlak loh zia hi Sawrkar leh Chanchinbu miten a hmun ngeiah min enfiah sak se kan duh. 

4. Mizoram Sawrkar Home Dept. aiawha Home Commissioner in Ministry of Home Affairs (MHA) ah Assam Rifles te in sawnna tur peih fel a ni vek tawh anga a sawi hi; peih fel ala nih loh zia Ministry of Home Affairs (MHA) hnenah thudik hrilh rawh se.