Aizawl June 27, 2024 : Aizawl District Hockey Association leh Thenzawl Hockey Assocition te buatsaih Zoliana Royte (Retd Director SYS) Memorial Hockey Tournament-ah hmeichhe final khel tur a chiang tawh a, Thenzawl Venghlun leh Thenzawl Field Veng te an inhmachhawn ang, naktukah Mipa final khel tur te an inchingfel ang.

Vawiin inkhelah Venghlun chuan 12-0 ngawtin Vengthlang an hneh a, K. Vanlalpeki, Venghlun chu Player if the Match atan thlan a ni. Field Veng chuan 4-1 in Bazar Veng an hneh bawk a, Lalsiamkimi, Field Veng chuan he inkhela player chetha ber atan an thlang.

He tournament-a tel Hmeichhe team pali te hi an inkhelh kual vek hnuah Venghlun leh Field Veng te hian final an khel dawn a, League-a an intawn tumin Field Veng hian Venghlun hi an lo hneh tawh a ni.

Nimin mipa inkhel awmchhunah Thenzawl Bazar chuan Baktawng 3-2 in an hneh a, he inkhelah hian Lalnunzauva, Bazar Veng chu Player of the Match-a thlan a ni a, naktuk hian Mipa lam hian semi final an khel dawn. Semi final inkhel hmasa zawkah Thenzawl Vengthlang leh Baktawng an intum ang a, Field Veng leh Bazar Veng ten semi final hnuhnung zawk an khel ang. Mipa leh Hmeichhe Final hi Inrinni-a khelh tur a ni.