Aizawl July 5, 2022 : Mizo Hnam Run-ah vawiin khan Zonet News Editor, J. Malsawmzuala Vanchhawng chu MNF President leh Chief Minister ni bawk Zoramthanga chuan MNF-ah a lawmlut. Hnam thuthlung vuantu Party-ah sengkhawm hna thawh mek a ni, Zoramthanga chuan a ti. 

Lawmluh thar J. Malsawmzuala Vanchhawng chuan,"Zalenna sualtu hnam hi ka ngaihlu tak zet a. MNF chu party tobul nghet nei, Mizo hnam a awm chhung chuan a awm ka ring. Nakum inthlanah pawh MNF tan tualto party dang beih tham an awm ka ring lo," a ti bawk.

MNF President chuan MNF lungphum leh thuthlung bulthum sawiin, "Kan thlahtu hmasaten Mizoram tlangram chheng chhia an lo luah chu Pathian remruat a ni," a ti a. "Khawchhak atanga thlang tlain Bangladesh phaiah lo tawp ta se, muslim kan ni vek mai thei. Zoram ngawpuiah tawp lovin Manipur leh Assam tawlh thleng se budhhist leh muslim kan ni vek ang, a ti a. Mizote chu chanchintha hril tura humhim tlat kan ni.

"Mizoram chu mahni ramri (territorial integrity) nei a ni a. Tawng pakhat (common language) nei, Lehkhathiam tamna, Kristian za a za leh Pathian thlarauin harhtharna a pek ngun ber a ni. Khawchhak Mongoloid leh khawthlang Aryan inang lo lutuk leh inpawm tawn lo karah Mizote chu a laiah - khawi lam lamah pawhin chanchintha hril turin min pawm. Asia ram huapin thlir ila chanchintha hril turin Mizoram ang an awm lo. Pathianin danglam taka a dahte kan ni a, hei hi kan lungphum - Pathian leh kan ram tan tih lo intanna a ni," a ti.

MNF kal zel dan sawiin, "Inthlanah chak loh chang awm mah se, tunah chuan (2018) MLA - hmun thuma thena hmun hnih kan nei mek a ni. Leiba ngah tiin min bei a, loan Rs vbc 1000 lak kan tum mekah min sawisel thin. He loan hi India Sorkarin  Rs vbc 720 min rulhsak dawn tih an hriat loh vang a ni," a ti a. "Kan harsatnate hi Pathianin min sut tlang sak zel dawn," a ti.

MNF President chuan Congress chu beih tham an awm tawh lo. Beih lutuk chi pawh an ni lo, an moral a down ang, a ti a. Kalphung thar tia kalphung thlak zing deuh an awm thute a sawi a. "MNF chu a tir atangin kalphung ngai rengin a la kal. "MNF atanga chhuakte chu a che fuh ngai lo. Hnam thuthlung kengtu kan nih tlat avang hian sengkhawm hna kan thawk mek a ni," tiin thuthlung vuan tlat turin party mipuite a sawm a ni.