May 24, 2022; Bairabi Zophai hmuna Assam lamin Mosolman biak in (masjid) an sak chu tun thlengin engmah khawih chhunzawm lohin a la awm a, Mizoram police leh Assam police ten an la awmchilh mek.

Bairabi atanga ZALEN thudawn danin, Zophai hmun a Mosolman biak in sak chu engmah khawih zawm loh in a la awm a, helai hmun hi Mizoram police 7 bawr vel leh Assam police 6 bawr velin chhunzan awmin an la thutchilh a, hnamdangte atang pawhin biak in sa tura nawrna engmah a awm hran chuang lo nia hriat a ni.

Mizoram sorkar, Environment, Forest and Climate Change Department (EF&CC) chuan mosolman biak in satute hnenah hian an hna chawlhsan tur leh an hmanraw chhawpte pawh senghawi tura hriattirna, kum 2019 September thla khan a lo pe tawh a. 

Mizoram sawrkar a EF&CC in lehkha a pekah hian biak In sakna chu reserve forest huam chhung a nih avangin forest conservation act kalh a nih thu hriattir an ni a, an hna thawh lai chawlhsan a, an hmanraw chhawp te pawh senghawi turin a hriattir a ni.