Aizawl November 22, 2022 : MPCC chuan Finance Minister Zoramthanga chu Mizoram sum leh pai enkawl thiam a ni tih finfiahna Budget Document-ah hmuh tur a awm lo, an ti. Mizoram hian sum leh paiah harsatna namen lo a tawk mek a. Hetiang dinhmunah hian Mizoram hi kum 1987-a State a nih hnu hian a la awm ngai lo a, tun anga dinhmun chhiaah hian kan la awm ngai lo, niin an sawi.

Nimina MPCC ten thuthar lakhawmtute an hmachhawn naah an Spokesman Dr. Lallianchhunga chuan, "Ramin sum harsatna a tawh mek lai hian Mizoram Finance Minister leh Chief Minister ni bawk, Pu Zoramthanga chu a ngawi tlat a. Puk belh zel tih mai loh chu sum leh pai dinhmun siamthat tuma a hmalakna thawm reng reng hriat tur a awm lo. Siamthat tum a hnekin, kan dinhmun chhiat zia sawichhuaktu apiang chu MNF hruaituten tawngkam buluk tak takin an beilet reng zawk a ni. Finance Minister pawh ni lo, MNF MLA leh an party hotu thenkhatte chuan Mizoramin sum leh pai harsatna a tawh mek hi sawi mam tumin thapui an thawh mek a. Hei hi mipui zah lohna dik tak a ni a. 

MNF Thalai te data an neih chu khawi atanga an neih nge tih zawt letin, "November 19, 2022-a MNF MLA Pu L. Thangmawia’n, “MPCC-in Mizoram leiba cheng vbch. 12553.08 a pung chho anga an tarlan hi khawi atanga data an neih nge? Tuilet hnuah Mizoram leiba hi cheng vbch. 12553.08 a la tling ngai lo hrim hrim,” a tih phei kha chu thil zahthlak tak a ni a, July 25, 2022-a Finance Department-in RTI an chhannaah chiang taka ziahlan a ni a. Mizoram Budget bu, Annual Financial Statement 2022-2023 phek 24-nah en theihin a awm reng bawk," a ti bawk.

Maliana chuan MNF Vice President chhawng letin, "November 21, 2022-a Hnam Run inkhawma MNF Vice President Pu Lalthlengliana'n, 'Pu Zoramthanga tluka Finance enkawl thiam Mizoramah an la awm lo,' a ti te phei hi chu MNF-in mipui an tham loh thin zia tilang chiangtu a ni. Finance chungchanga Mizoram dinhmun chhiat zia en hian Finance Minister Pu Zoramthanga hi fak hun a ni lo a, siamthat duh tak tak tan chuan na taka sawisel hun a ni zawk. MNF sawrkar hian Mizoram sum leh pai dinhmun siam that tuma hmalak mekna a nei lo a nih chuan sawi pial tumin hma la tawh suh se. Mizoramin sum leh pai harsatna a tawh mek hi ram leh hnam hmangaihtute chuan kan ngai thutak hle tur a ni a, sawi mam tuma tanlakna chi a ni lo," a ti. 

Congress pawhin an sawrkar laia sum an puk thu sawiin, "Kum 2008 a Congress sawrkar a lo pian khan sum dinhmun sawngnawi tak a rochung a. Term 1-na (2008-2013) chhung phei kha chuan RBI atangin Ways & Means hmangin sum an puk deuh reng a ni. Sum dinhmun tha lo hi sawrkar lai tan mualphona anga ngaih theih ni mah se, Finance Minister Pu Liansailova leh sawrkar hotute khan mipui lakah a lema insawi mam leh sum harsatna thup tum lovin, an sawichhuak mai a, sum harsatna sutkian tumin hma an la a," a ni, tiin, an hlawhtling hle a niin a sawi.

Congress sawrkar laia sum dinhmun tha lo thup lova Liansailova hmalakna chhunzawmtu Finance Minister Lalsawta hmalakna chuan rah tha a chhuah niin Congress spokesman chuan a sawi. "CAG Report atanga a lan danin kum 2015-16 ah Mizoramin Fiscal Surplus 3.09% lai kan nei. Kum 2016-17 Budget-ah state kan nih hnua a vawi khat nan Surplus Budget (revenue surplus) kan nei tan a. Kum 2016 June 30 hnu lamah RBI atangin Ways & Means hmangin sum puk a ngai tawh lo bawk a. Congress sawrkar liam ta khan MNF sorkar hi cheng vbch tam tak a hnutchhiah hial a ni. MNF sawrkar tirh kum 2019 a sum tam zia Pu Zoramthanga’n a sawi thin kha, Congress sawrkar hnutchhiah sum cheng vaibelchhe tam tak vang a ni," a ti.