ZALEN January 15, 2024 : Vawiin hian Mizo Hnam Run hawnna hun hman a ni a. He hunah hian President Zoramthanga chuan thu sawiin amah leh Tawnluia'n an tel lovin party kal tawh se tha an tih thu a sawi.

Zoramthanga chuan Party-a a nihna chungchang sawiin, "Pu Tawnluia nen kan sawi dun a, kum 80 chunglam ve ve kan lo ni tawh a, keini tel lovin kal tawh se kan ti a ni. Kan Party tan hian theih tawp kan chhuah zel dawn a, hotute pawh kan hrilh tawh a, hotuten remruatna an la rawn nei mai ang," a ti a. MNF hruaitute ni lai term a tawp tawh thu sawiin, "Hotute hnenah keini chu min ngaihtuah tel tawh suh u, kan ti a ni," a ti bawk.     

Zoramthanga chuan, "MNF lungphum chu Pathian leh kan ram tan, tih a ni a. He thuthlungin a man a pek tawh hi a tam em em a. Khawkhawm, hmeithai, fahrah leh martar thisen tam tak a luang a ni. Party tam tak a lo dinchhuak tawh a, an ral leh ṭhin a, MNF erawh chu kum 63 chhung Pathianin a hruai tawh a. Kum 63 chuang Pathian leh kan ram tana kal tawh kan nih kha, inthlan vawi khat vang maiin kan nghing tur a ni lo," tiin MNF mipuite a chah a ni.  

MNF President chuan, "Kan ramah hian Party lian tak tak an lo awm tawh ṭhin a. Vung takin an vanglaiin awm ṭhin mahse, an tlachhe zel a. MNF Party erawh chu kum 63 chhung nghet takin 'Pathian leh kan ram tan' kan la dingnghet zel a ni. Tun dinhmunah pawh hian MNF hi Party ruhrel nei ṭha ber kan la ni a. Chu chu Pu Laldenga emaw, Zoramthanga vang emaw ni lovin Pathian leh kan ram tan, kan tih tlat vang a ni," a ti bawk.