Aizawl July 27, 2023 : Mizo National Youth Front (MNYF) Headquarters chuan tunhnaia MNF President leh Chief Minister Zoramthanga'n Meitei ten an beih fo chhan chu Manipur state-a remna leh muanna a awm theihna tura ke a pen avang leh zohnahthlakte thlavang hauhna kawng a hma nasa taka a lak vang a ni, an ti.

MNF Thalai chuan, "Mizoram pawn hmun hrang hrang aṭangin MNF President leh Chief Minister Zoramthanga chuan beih a tawk nasa hle a. Hetianga beihna liantak a tawhna chhan hi Manipur state-a remna leh muanna a awm theihna tura ke a pen avang leh, kan unaute thlavang hauhna kawng a hma nasa taka a lak vang a ni. Nimin July ni 26 khan Manipur khawpui Imphal ah Meitei nu ho leh an thalai pawl (Meira Paibis, Arambai Tenggol, Meitei Leepun-ni ngei a hriat) te chuan Chief Minister Pu Zoramthanga lim leh thlalak hi hmun hrang hrangah hal in, nasa takin an diriam a ni," a ti.

MNYF chuan, "July ni 25 (Thawhlehni) pawh khan Manipur University chhunga Meitei zirlaite chuan Chief Minister lim hi an lo hal tawh bawk a ni. June ni 7 khan All Assam Manipuri Youth Association hmalaknain Assam state hmun hrang hrangah Zoramthanga lim hi hal a ni a, All Assam Manipuri Youth Association (AAMYA) phei hi chuan MNF-in Manipur-a kan unaute inrelbawlna hran (separate administration) a thlawp chu duh lovin, June ni 14,2023 (Nilaini) atanga chhiar a, ni 3 chhunga MNF-in Manipur Zohnahthlakte inrelbawlna hran a thlawp chu a hnukkir lo a nih chuan harsatna lianzawk Mizoramin a hmachhawn theih thu leh, Mizoram leh Assam inkalpawhna kawngpui danchah an tum thu an lo sawi hial tawh a ni," an ti bawk. 

MNF Thalai chuan, "'Kan chipui leh kan unaute tawrhna chu kan tawrhna a ni a, an tan ka theihtawp ka chhuahzel dawn,” titu MNF President leh Chief Minister Pu Zoramthanga’n a mite a hmangaih avanga a tawrhna hi ropui a tiin a chhuang a, Zofate min kaihruai tura chakna a neihzel theihnan Zoram mipuite pawh ṭawngṭaina lama lo hre reng turin kan ngen tak meuh che u a ni," an ti.  

Mizo National Youth Front (MNYF) Headquarters chuan NGO Co-Ordination Committee hmalakna leh ruahmanna a Manipur state-a zohnahthlatde thlavang hauhna kawngzawh leh inkhawm; Mizoram hmun hrang hrangah hlawhtling taka neih a ni chu lawmawm an ti a, Zofate’n in unauna leh inhmangaihna thar a chharbelh an beisei tlat thu an sawi bawk.