Aizawl May 8, 2023 : Vawiin khan Zo-Reunification Organisation (ZORO) chuan Manipur State chhunga Meitei leh Zofate inkara buaina awm chungchangah Zofate inrawnkhawmna Dawrpui Multipurpose Hall, Aizawl-ah a nei a, resolution an pawmah hmeichhia leh nunau pawisawi lo ten an tawrhna an dem thu an tarlang. 

He huna hian Mizoram state chhunga Political party aiawh, NGO aiawh leh Kohhran aiawh atangin member thahnem tak an kal a, inrawnkhawm ah hian member hi 54 an kal a, he hun hi ZORO President R. Sangkawia chuan a kaihruai a ni. Kalkhawm te hian Manipur tualchhung buaina a Zofate tawrhna chu pawi an tih thu te, Zofa ten chhawmdawl an ngaih thu te, khawvel hmun hrang hranga Zofate tanrual a ngaih thu te an sawi.

Zofate inrawnkhawm-a kal te hian a hnuaia mi ang hian resolution an pass a ni.

i) Manipur a Meitei leh Zofate inkara tualchhung buaina chhuaka Zofate tawrhna hi kan dem in kan duh lo hle a, hetiang tualchhung buaina, a bikin chak lo zawk hmeichhia leh nunau pawisawi lovin an tawrhna hi kan dem takzet a, thleng nawn tawh lo se kan ti.

ii) Manipur-a Meitei leh Zofate inkar a tualchhung buaina hi ring lo mi ten Christian an tih duhna ah kan ngai a, hetiang hi India ram sakhaw zalenna ah chuan thleng nawn tawh suh se.

iii) Manipur-a Meitei leh Zofate inkar a tualchhung buaina avanga Zofa nunna chan te, hliam tuarte, in leh lo chan te leh Biakin an tih chhiat te zangna dawmna Manipur Sorkarin a pek hi kan phut tlat a ni.

iv) Manipur Sawrkarin kawng hrang hranga Zofate pawi a khawih hi ram chhung leh ram pawn thleng pawha puanzar leh siam thata a awm theih nan ZORO in phungbawm sawmin hma la se la, hemi chungchang hi United nations Organisatin (UNO)-ah thlen ni rawh se.

v) Manipur tlangram hi Zofate luah ram ni a, a ram nei tu chu Zofate (Indigenouse People) kan ni. Chhuanlam hrang hrang hmanga Manipur Sawrkar in Zofate in leh lo chhuhsak tum a, hma a la hi kan duh lovin kan dem takzet a. Zofaten an hmakhua ngai a, hma a lakna peaceful tribal solidarity march an buatsaih avanga tharum thawha Zofate an bei chiam hi hriatthiam har kan ti hle a. Manipur Sawrkar hian Zofate hi an ram chhuhsak a tum na chiang tak a ni.  Manipur a Zofate hian Manipur Sawrkar ah him lovin an in hria a, chuvangin an himna turin rorelna hranpa India sorkar in a pek kan phut tlat a ni.