July 7, 2023; Vawiin chhun dar 12 khan ZO-Reunification Organisation (ZORO) chuan executive committee meeting an nei a, he hunah hian Manipur tualchhung buai avanga Zohnahthlak unaute harsatna tawh mek chungchang sawi a ni.
 
ZORO thuchhuah tarlan danin, Manipur-a Zofate tih chimih leh nuaibo tumna kal mek chuan thla hnih a lo pel ta a, he hmalakna tenawm tak hian kian zai a la rel lo. ZORO chuan Manipur-in a awp mek Zofate a hnam anga nuai bo an tum mekna atanga damkhawchhuak tura an beihnaah leh Manipur rorelna laka la hrang tura India sorkar an ngen mek chu a thlawp a ni tih hi an puang nawn leh a ni.

ZORO executive committee meeting chuan, July ni 12, 2023 (Nilaini) chhun dar 12 ah Vanapa Hall kawt-ah punkhawm buatsaih a tum a. Hemi ni hian Manipur Chief Minister Biren Singh lim hal tur a ni a, India Prime Minister Narendra Modi chu Manipur buai chungchang ah engmah a sawi ngam loh avangin a lim hal tur a ni bawk. Tin, kan unaupa Zo Tlangval David Thiek rawng taka that tu Mairembam Romesh Mangang lim hal tur a ni bawk.