Aizawl June 9, 2023 : Zo Reunification Organisation (ZORO) chuan Coordinating Committee on Manipur Integrity (COCOMI) ten Manipur-a Zofate (Kuki-Chin tia sawi chang awm thin) te do an puang chu atthlak an ti a, a dem takzet tih thuchhuah an siamah an tarlang. Ro an rel dan chu Meitei-ho khawngaih thlakna an ti a, mi pangngai deuh, a tak leh suangtuahna ram thliar thiam hruaitu nei hlawm se hetiang hian an tih a rinawm loh, an ti.

ZORO chuan, "He indo puan hi mahni chauh leh mahni ngaihdan chauh hi khawvela awm emaw tihna ril atanga lo chhuak niin a lang a; mihring a nuai tel ve teh meuh mai narco-terrorist tia han puhkhawm ngawt mai leh chutiang chu midangin an ring thei ang tih ngaihdan an nei hi Meitei-ho vanduaina tak pawh a ni awm e. Dawta innghat hnam nih pawh an inhmeh tawk viau reng a ni. 
Kan history pawh kum sang fe kan chhui thei tia inham puar thin, mihring nuai tel tak meuh ni ve si hetiang ngaihdanin a hruai thei hi hnam khawngaihthlak tak an ni," an ti.

ZORO thuchhuak chuan, "Hmanlai atang tawha min rawn do hlawhtling ngai lo, dawt hmanga kan hnam Lal pakhat lo man ve hnam hian kan lakah indo an puang a ni. Thil pakhat nitina an chham thin tur chu “Meitei Lal hnuaiah Zo Lal tumah an kun ngai lo” tih hi a ni. An duh chuan “Meiteiin Zo hnam kan ngam ngai lo” tih leh “British zarzo-in Manipur state-ah kan lo awp ve a ni” tih te pawh chham tel rawh se," an ti.

Meitei te hriat tura an duh tarlangin, "Khawvela hnam chak ber ni thin British kha an vanglaiin kan hneh lo ngei mai a, anni lo chu kan do hi chu hneh loh kan nei lo tih pawh hi Meitei hian lo hre rawh se. British-in min awp khan anmahni remchanna tur ngaihtuahin Manipur behchhanin Zo hnam eng emaw zah min awp a, chumi an rochun avangin kei tak emaw an inti ve tlat an ni. Anmahni hneh leh lak ngeite hi an ramah puang ni se an zahawm ve ang," tiin.

ZORO chuan, "Suangtuahna khawvela cheng, mi kuhmuma par tura inngai, mahni chaknaa min la hneh ngai lo te hian min hneh theih dan tur thuruk hre thara inngaiin min do an puang chu a ni a. Zofate hi kan lo inven a, kan ram kan lo hum ve ngei a ngai dawn a, min rawn beih nasat chuan mihring leh ralthuam chu an heh ve khawp ang. Tuna kan lo inven dan leh an thlen chin atang pawhin a hriat tho awm e," an ti bawk.

Meitei hian indo hi an duh a an puan miau chuan indo a ngai a, inven a ngai a ni mai a; India sawrkar pawhin Meitei te chu zilhau se tha an tih thu an sawi bawk.