Aizawl September 11, 2023 : ZPM chuan party chuan vawiin khan an office-ah chhung inkhawm kan hmang a, he huna thusawitu pakhat ZPM Candidate Lalnghinglova Hmar chuan Mizo thalai ten MNF leh Congress an buaipui lem lova, an beiseina awmchhun ZPM-ah rinna an nghat mek niin a sawi. 

Aizawl West II ZPM Candidate Lalnghinglova Hmar chuan, “Mizo thalaite hian MNF leh Congress an buaipui lem lova, tun atanga kum 5 lo awm turah he ram hi engtin nge a awm ang, tiin kan ram dinchhuah nan ZPM hi beiseiawm a ni a, anni leh zel pawhin an ti thei lo a nih chuan kan hma hun a thim hle dawn a, chuvangin an beiseina awm chhun ZPM-ah rinna an nghat mek a ni. Retheihte retheih chhan bul pakhat chu kan zirna chungchang vang a ni a, ZPM kan sawrkar a nih chuan nasa takin zirna lama hma kan sawn leh zualna turin kan thawk dawn," a ti.

Zirna chungchang sawiin, "India ram huapa tehin Mizo zinga titha ber pawh a thiam ho intihsiakna ranking-ah nuaih hnuaiah kan awm a, zirnaah rual kan awt a, 'Aw Zoram lo dingchhuak rawh, I tan khua a var dawn ta,' kan tih theihna turin kum 2023 inthlanah hian duhthlanna kan siam dik a ngai," a ti.

Ruihhlo chungchang sawiin Lalnghinglova chuan, "Kan ramah ruihhlo a hluar em em a, a kum telin ruihhlo an man tam tial tial a, zu chungchangah nen kan ram a dam loh zia a lang mek. ZPM chuan Mizoram tha zawk din kan tiam a, vaiho pawhin an tih theih chu keini ringtute chuan kan ti thei ngei ang tih kan ring a, eiruk lohna ringawt pawh hian sang takah kan ram a khai chho thei a ni,” a ti.