Aizawl January 15, 2024 : Congress party chuan vawiin khan Congress Bhavan hawnna Programme an hmang a, he hun thusawitu MPCC President Lalsawta chuan Inthlanah khan an party chuan theihtawp an chhuah a ti a, mahse mipui lamin an lam an hawi lo a, ZPM an chhin phawt loh chuan an lung a awi lo niin a sawi.

Lalsawta chuan, “Kan party-in inthlanah khan theihtawp kan chhuah a, Manifesto tha takte kan duang a, hna nasa takin kan thawk a, mahse mipui in keini lam an hawi lo. Mipui in ZPM lam an hawi a, chhin an duh a, an chhin phawt loh chuan an lungawi lo a ni. ZPM hian an intiam ang ngeiin tumah duhsak bik nei lovin thawk se ka duh a, Minister ten an thutiam an lak ah khan, mi zawng zawng angkhata en turin an intiam a. Chuvangin party induhsakna te ti ve lo va, mihausa leh midiklo te hruaikawi mai mai theih nilo turin ka duh a, political will nei se, ram tana tha lo ti lo ngam turin ka duh a, huaisen takin an tihtur ti ngam turin ka duh a ni," a ti.

MPCC President chuan, "Kumtharah hausakna um nana politics te kan hman loh nan mithar ni ila, he kumthar hian keimahni ah harhna min pe se, kan ram hi a tha, Pathian pek a ni. Mihring pawh an tha, Pathian pek bawk a ni. He thil pahnih ram leh mihring kan nei tawh a, kan ram tana hnam rohlu pahnih kan neihtawh hi chuan a enkawl thu thu he lei mihring danah chuan a ni tawh," a ti.