ZPM duhsaktu leh dodaltute pawhin ZPM thli a tleh tih hi an pawm vek- K.Sapdanga
![](/storage/news/post/kJwLERnNfTZ0oVT62XVIJCKGb3Y6HFeFaw4CdvyY.jpg)
Aizawl May 8, 2023: Vawiin thawhtannni khan ZPM chuan chhung inkhawm an hmang a, he huna thusawitu, Working President K. Sapdanga chuan, “ZPM thli a tleh tih hi ZPM mipuite chauh sawi a ni lo a, ZPM duhsaktu leh dodaltute pawhin ZPM thli a tleh tih hi an pawm vek a ni,” a ti.
ZPM Working President chuan, “Tunlai Mizoram politiics-a chanchin sawi tam ber chu ZPM chanchin a ni a, ZPM thli tleh hi eng hun atanga tleh tan nge rin thiam a har rualin thli sulhnu langsar taka kan hmuh leh hriatfiahna chiang tak chu Lunglei Municipal inthlan kha a ni awm e. Lungleia thli tleh chhan kha RT-PCR khawl bun duh loh vang te, by-pass road siam duh loh vang te, kawngpui chhiat vang te niin kan ring a, a dikin a dik lo mai thei. A hnu lawkah kha thli tho kha Zemabawk leh Leitan-ah te a tleh leh a, RT-PCR leh by-pass road awm ve lohna hmunah pawh na takin a tleh tho mai. Inthlan dawn apiangin politics thli hi a tleh thin a, sum leh therhlo vang tein a ni fo bawk thin. Mahse, Lunglei mipui rilru chhem kaltu thli te, Zemabawk leh Leitana thli bing tleh te kha chu sumin a tlehtir a ni lo tih hrechiangtute chu mipuite kan ni,” a ti.
K.Sapdanga chuan, “He thli hi a tleh zel dawn nge a tawp dawn tih tumahin kan sawi thei lova. ZPM hi inti Kristian bik, inti Kohhran bik, inti Pathian thuawih bik leh chu chu chapopui ta viau anga puh kan ni reng a. Kan president te, kan chief ministerial candidate te Kohhran upa min an nih vang te pawh a ni ang, kan lakah mi thikthu a chhiain beiseina an nei sang bik niin a lang a, chuvangin party mipuite kan chapo tur a ni lo. Thli siamtu Pathian lamah rilru dik pu turin theihtawp chhuah ila, rilru hmun khat puin a duhna lam hawia thli tlehtir thintu duhzawng hi kan ngaihpawimawh zel a tul takzet a ni,” a ti bawk.
Manipur-a Meitei leh tlang mite buaina chungchang sawiin ZPM Working President chuan, “Manipur-ah Zohnahthlak unaute’n buaina nasa tak an tawk mek tih kan hria a, a phena thil inphum lian tak nia lang chu Kristiante nekchepa nek ral tumna a tel nasa hlein a lang. Kan unaute manganna hriain kan Chief Minister hovin Mizoram sawrkarin chhanhimna kawng an zawng tih thawm te kan lo hria a, kan thlawp a, party anga tangkaina kan neih phawt chuan kan inring reng a ni tih sawrkar hnenah pawh kan thlen tawh a ni,” a ti bawk.
ZPM chhung inkhawmah hian Leader Lalduhoma pawhin thu sawiin " Kum 131 kalta kum 1892 khan Culcutta-ah Chin Lushai Conference neih a ni a, chutah chuan kan hnam chungchang hi an lo ngaihtuah tawh. Zo hnahthlak te zaikhatah luanga rorelna pakhat hnuaia awm turin ruahmanna an lo siam tawh a; mah se, a tlang zo lo kha a pawi takzet a ni. Kan hnam chungchangah hian Pathianin thil tum a nei niin a lang a, kum 2007 UNO Resulution-ah pawh chuang tawhin, kan thenawm rama Zohnahthlak te’n harsatna eng eng emaw an tawh hian Zo Re-unification mei mit lek lek tawh hi a tinung thar zel nite pawhin a lang. Mizoram ti lova, Zoram People's Movement kan tihna chhan pawh Zohnahthlak te inpumkhata kan awm theihna leh pawm tlan theihna turin he movement thlir phak hian party hming kan hotute’n an phuah a ni. A tawrh hreawm mah se, Pathian hian hnam anga kan dinchhuahna turin kan chunga thil o thleng thinah hian tum a nei a niin a rin theih a ni,” a ti bawk.
Latest News & Chhiar Hlawh
-
1m | Sep 07, 2024
-
2m | Sep 07, 2024
-
1m | Sep 07, 2024
-
1m | Sep 07, 2024
-
1m | Sep 06, 2024
-
1m | Sep 06, 2024
-
2m | Sep 06, 2024
-
3m | Sep 06, 2024
-
1m | Sep 06, 2024
-
1m | Sep 06, 2024
-
2m | Sep 06, 2024
-
1m | Sep 06, 2024
-
2m | Sep 05, 2024
-
1m | Sep 05, 2024
-
1m | Sep 05, 2024
-
1m | Sep 05, 2024
-
2m | Sep 05, 2024
-
1m | Sep 05, 2024
-
1m | Sep 05, 2024
-
1m | Sep 04, 2024