Aizawl June 3, 2024 : Vawiin khan ZPM General Headquarters Office-ah Party chhung inkhawm an nei a, he huna thusawitu Minister of State Lalnghinglova Hmar chuan, “Ram mipuite hian min enchhin mai ni lovin min enchik a hle a ni," a ti.

Minister Lalnghinglova Hmar chuan, “ZPM-in Sawrkarna a chan tirh December 8, 2023 atangin Sawrkar kalphunga thil pawimawh zawm ngaite zawmin hun kan hmang nasa hle a, Budget Assembly zawh a nih hnu lawkah MP inthlanin a zui leh a, vawiin thlengin Model Code of Conduct-in min la phuar reng a. Hnathawh nana hun kan neih tlem ngaihtuahin Pu Lalduhoma kaihruai ZPM Sawrkar hian hna tam tak a thawk tawh a ni. Kum 1987-ah state kan ni a, chumi hnuah Political Party pahnih Congress leh MNF Party ten ro inrel chhawkin kan ram tan thil tha tam tak an lo ti tawh."

"Chutih laiin rualawhna leh thil thar beiseinain mipui rilru a tuihal em avangin Kalphung thar Mipui Sawrkar- ZPM Party kan lo lang ve ta a ni. Mipuiten ZPM Sawrkarah hian beiseina an nei sang hle. Mipuite hian min enchhin mai ni lovin min enchik hle a, kan ke pentin hi beiseina nen min thlir reng a, vawi leh khata ram kalphung thlak hlawk thei magician ang hialin min ngai a ni. Chuvang chuan mipuite beiseina hi kan hriat reng a ngai a, kan ram tan hma lam pana kan kal zel hi a tul hle a ni,”a ti.

Tetea Hmar chuan, “ZPM-te hian Ruling Party kan ni ve tawh tih hi kan hriat a ngai a, Rulling party chuan beih an tawk nasa thin. Chutiang chu kan dinhmun a ni chho zel dawn a, sawiselna zawng zawng chhanlet a tul ber lo a, tawng hun a awm a ngawih hun a awm a, puitling takin rulling party kan ni tih hriaa kan awm thiam a ngai hle a ni. Social media lama inbeihnate pawh hi enliam chin neih a ngai a, mipuiin min bei lo tih hriat reng a ngai, mi tlemte hrat lak ve hrim hrim te thil tih hi en dan tawk kan thiam a ngai a ni. Tunhmain rorelna chelhtu party worker-te zingah Sawrkar hnathawk lo vau duh tawkte pawh an awm niin an sawi thin, ZPM-te erawh chuan nunze mawi tak kan chawinun a ngai a, ruling party nih kan thiam a ngai hle dawn a ni,”a ti.

Minister Tetea chuan, “Politician-te hian politics kan luh chhan a in ang lo hlawm viau a, engtak hi nge kan politics khelh chhan tih hi mahni inzawt nawn fo tur a ni. Mahni tanghmahai nan ringawt politics-a lut a awm thei a, chutiang mite chu ram thanmawhbawk an ni fo, ZPM te erawh chu kan in sawi angin kan danglam bik tur a ni a, kan politics luh chhan hi ram hmangaih vang a ni tur a ni," a ti.