Aizawl: ZPM Thalai te chuan School Education Minister Lalchhandama Ralte chu zirlaite hma-khua ngaiin a nihna atangin bâng ngam se an duh tih an sawi.

Nimina thuchhuah an siamah Primary leh Middle School zirtirtu (MR Skilled - II) a lakna turah MTET pass/clear lo leh Computer proficiency certificate nei lo mai ni lo, written exam pawh buatsaih lova, interview chiah hmachhawna lak an tum hi, Mizoram zirna nasa taka pawngsualnaah an ngai tih an sawi a. Primary School teacher 817 leh Middle School teacher 64 lai mai lakna tur advertisement hi Directorate of School Education website-ah tarchuah a ni a, MTET Certificate leh Computer proficiency certificate an neih theih nana theihtawp chhuaha hlawhtling thahnem tak an awm lai leh, written exam hmachhawn thei tura an inbuatsaih mek laia hetianga mawlmang lutuka zirtirtu lak tum a ni hi ZPM Thalai Gen. Hqrs. chuan pawi a ti tak zet a ni, an ti.