Aizawl: Zoram Nationalist Party (ZPM) Thalai chuan Chief Minister in lei a hawn tawh; mahse, hman theih a la ni lo chu pawi an ti hle tih an sawi.

Nimina thuchhuah an siamah ZPM Thalai chuan Bairabi tawntirh a Kawnpui lui lei dawh mek chu ni 05.01.2021 khan Chief Minister Zoramthanga chuan a hawng tih sawiin mahse he lei dawh hi hawn anih hnuah vawiin thlenga hman theihin a la awm lo niin an sawi a. “MNF hian sawrkar chak tak anga lan an duh luat leh hming that an duh luat vangin lei dawh zawh loh chu hawngin, mipui bum mai pawh an pawisa lo niin a lang,” an ti.

ZPM Thalai chuan hna thawh chhunzawm hmuh tur awm si lova lungphum phum leh ringawt thin te, lei dawh hna la thawh zawh loh hawn leh ringawt thin te hi, mipui bum tumna leh mipui tham lohna ramhlui zia a nih avangin sim tawh turin MNF sawrkar an ngen tih an sawi a. “Hetianga an chet hian MNF sawrkar chu mipui bumtu sawrkar an nihna leh mahni leh mahni inbum sawrkar mai an ni tih a pholang chiang hle a, sawrkar hian ram leh hnam hmasawnna aia lemchan a thupui zawk thin hi sim ngam turin kan ngen a ni,” an ti bawk.