ZALEN July 27, 2023: ZPM Leader Lalduhoma chuan Corruption chuan thinlung mai ni lo, ram leilung leh nungcha a tichhe mek a ti. An sawrkar chuan an do hmasakber tur chu Corruption a nih thu sawiin ni 100 chhungin hmalak tul zual tih hman an tum thu leh an candidate te chu ‘Ka eiru ve dawn lo’ tia thutiam turin an chah reng niin a sawi bawk.

East Tuipui Constituency huam chhunga Khuangleng, Sazep, Vangchhia, Bungzung, Vanzau, Leithum, Dungtlang khua te a tlawh naah ZPM Leader chuan, “Leiba kan ngah hle mai a, tuna kan leiba hi a rulh pawh a hautak dâwn hle mai a. Kan sawrkar veleha kan do tur hmasak ber chu corruption a ni. Corruption hian kan thinlung mai ni lovin kan ram leilung leh nungcha a tichhe mek a ni. Corruption hi ni 100 chhung hian hmalak tul zual tih hman kan tum a, kan candidate zawng zawngte hi ‘ka eiru ve dawn lo’ tia thutiam turin kan chah reng a ni. Thil dangah pawl dang kan phak lo mai thei, amaherawhchu kan mite hi eiru ve lo turin kan infuih nasat avang hian an ti ngam lo turah kan ngai a, an lo ti a nih pawhin kan siksawi hreh dawn lo a ni,” a ti bawk.

Duhoma chuan, “ZPM-in a piantirh atangin beih a tawk nasa a, tunah phei chuan beih rawn kan tawk mek a ni. ZPM atangin an bang nasa tih te, kei ngei phei chu Arabian sea-a hleuh kai tih mai mai hmangin min bei a ni. Chutih laiin ni tin mi thar duhawm tak tak kan nei a, hmun hrang hrang atangin report a rawn lut reng a ni,” a ti. 

ZPM Leader chuan, “ZPM-a sawrkar chuan tar pension ₹1000 in kan ti pung dawn kan tih kha hna hmasaah kan telh a. Thlai zawng zawng kan lei seng dawn lo va, kan lei hmasak tur chu Sawhthing, Hmarcha, Aieng, Hmunphiah te a ni a, a rate pawh kan tarlang tawh a ni. Kumpui lingleta rim taka hna kan thawh thin a lo hlawk theih nan ruahmanna kan siam a ni. Mumal takin contract farming leh vegetable supply chain kan ti dawn bawk a, kan duh duh thlai ching mai lovin a rate awm sa leh hre sa-in thlai chin tur kan thlang dawn a, kum tina lo vat tawh lovin eizawnna ngelnghet kan neih theihna turin hma kan la chho zel dawn a ni,” a ti bawk.