ZALEN November 28, 2024 : ZPM Thalai chuan Chief Minister Lalduhoma'n a lo sawi tawh thin anga Mizoram sawrkar hnuaia Department hrang hrangte hmalakna enpuina (Departmental Review Meeting) chu nei tanin, Minister leh Official te, an hnathawh hrang hrangte chipchiar taka sawihopuina leh enho puina a nei tan ta chu lawmawm an ti.

ZPM Thalai Headquarters chuan, " Mahni thutiama, a taka ding nghet Chief Minister Lalduhoma kan nei hi ZPM Ṭhalai chuan ram mipui tan a thlamuanthlak kan ti a. Chief Minister Lalduhoma kaihhruai ZPM Mipui sawrkarna hnuaiah hian thil thar tam tak hmuh tur a awm chho mek zel a, heng bakah hian Project Monitoring Committee te pawh din tawh niin, project thawh mek 40 vel an endik tawh a ni."

"Department tinah service review committee din tura hmalak mek a ni bawk a, Sawrkar hnathawk, chhawr tlak si loh an awm chuan dan ang taka chhuahtir a, Sawrkar hnathawk quality ngei lak luh thin an ni ang. Kalphungthar mipui sawrkarna hnuaia Chief Minister Lalduhoma hmalaknate hi lawmawm kan tiin ZPM mipui sawrkarna hnuaiah Zoram hian rahbi thar a kai mek a ni," an ti.