Aizawl November 30, 2022: ZPM Leader Lalduhoma chuan ZPM hun a herchhuak tawh a, party a inziah luh ngai ti lo, ZPM-a sawrkar loh hlau a theihtawp a beitute neutral rual tam tak an awm tawh a ti a, pen chhuak zel turin an ngen tih a sawi. Hand holding policy an neih chu sem policy nen a inanglo niin a sawi bawk.

Tuikum Constituency-a Lungpho-a thu a sawinaah Lalduhoma chuan, “ZPM hi mipui movement a ni a, mi zawng zawng tana din a ni. Political party hi an hun a liam tawh chuan khawtlang tan te, bial tan te, ram tan te rawngbawl a harsa tawh thin a ni. Tunah chuan ZPM hunpui a her chhuak ve ta tih hi kan pawm thiam ka beisei a, neutral thinlung pu tam tak kan awm tawh a, party a inziah luh kher ngai ti lem lo, amaherawhchu, ZPM-a sawrkar loh hlau a theihtawp a beitute neutral rual tam tak an awm ta a, heng te pawh hi lo pen chhuak zel turin kan ngen a ni,” a ti bawk.

Duha chuan, “ZPM hian kan ram chhanchhuahna turin mithiam rualte nen policy kan duang a, heng kan policy tam tak hi tihlawhlting tur chuan power kan mamawh a ni. Brig T Sailo te ang kha Chief Minister-ah nei reng ila chu power-ah hian kan intodelh kan ring tawh a, Pu Thena policy kha tihlawhtling tûrin theihtawp kan chhuah dawn a ni. Kan ram kawngte hi a chhe em em a, khaw thenkhat chu khawtlang mipuiin hnatlangin kawng an siam tha thin a, sawrkar tan a mualphothlak hle a ni. ZPM chuan kan kawng te hi ngaihpawimawh hmasakah kan nei dawn,” a ti. 

Kuthnathawktute leh ZPM chungchang sawiin, “ZPM hi kuthnathawktute thian a ni a, hand holding policy kan nei a, bultanna nei lo ten bul an tan theihna turin an banah kan kai dawn a ni. Mahni chhungkua theuhin eizawnna atana kan duh, kan thiam zawng te bul kan tan theihna tûrin bul kan tan sak dawn a ni. Kan thalaite khawvel tukverhah an dak ve thei tawh a, ram hmasawn zawkte tih dan an hria-in an hmu a, ti ve thei tur pawhin thiamna an nei. Thalaite zingah mi tumruh, taima leh hlawhtling tura chhawmdawl tlak leh tanpui tlak chu kan tanpui ang. Kan hand holding hi sem policy nen a in ang lo a. Sem policy chu a inzatin an sem tawp mai a, eng trade nge, eng project nge enfiah pawh a awm lo va, an party a mi lakluh nan leh vote zawn nan an hmang a, development a ni lova, vote zawnna hmanrua mai a ni,” a ti bawk.