Aizawl July 17, 2023 : Congress party chu Ni 29.10.2018-a Zaingen YMA Hall, Khawzawl-a ZPM Leader Lalduhoma'n vai thirchhe siamna Lengte-a ISPAT Industry chu cheng vaibelchhe 100 tam tak sawrkarin loan a pe a, chutah chuan Congress sawrkar chu Guarantor-a tanga ang sawi chu dawt a nih thu an sawi. RTI hmangin finfiaha a nih thu an sawi.

Congress chuan, "Lalduhoma hian Guarantor a tang tih awmzia chu ISPAT Company khuan a loan lak a rulh theih loh chuan Congress sawrkarin a rulhsak ang tihna a ni, a ti a. He thu hi kum 4 liam taa a sawi pawh nise dawt a nihna a la bo loh avang leh he a thusawina Video hi Youtube hmanga vawrhdarh a la nih lehzel avangin thudik zawk mipui hriata puanchhuah tulin kan hria a ni," an ti.

Lalduhoma thusawi chungchangah hian MPCC Legal Cell member, Laldingngheta chuan RTI zawhna a siam thu Congress chuan an sawi a, July 4, 2023 a Commerce & Industries Deptt in a chhanna atanga a lan danin Commerce & Industries Department, Govt of Mizoram in ISPAT Industry hnenah loan pek a nei lova, gurantor-ah pawh a tang lo, tih a ni, an ti.

Congress chuan, "ISPAT Industry ten loan an dilnaah Industry Director chu Guarantor-ah a tang lo tih leh Mizoram sawrkar pawh Guarantor-ah atang lo tih hi February 21, 2012 khan sawrkarin a thuchhuahah a lo tarlang tawh a ni. Ni 27 April, 2016 a sawrkar thuchhuahah ISPAT Industry hian an bul tan nan NEDFI leh SBI, Guwahati atangin loan cheng vbch 20 an lak thu tarlan a ni a. Pu Lalduhoma’n Mizoram sawrkarin cheng vbch 100 tam tak loan pe anga a sawi hi dawt chiang tak a ni," an ti bawk.