Aizawl May 29, 2024: Vawiin khan ZPM Party Office ah, Party chhung inkhawm neih a ni a, he huna thusawitu Vice President C. Lalnunnema chuan thla reilote chhungin Chief Minister Lalduhoma kaihhruai, ZPM Ministry chuan ram tan thil tha tam tak a ti tawh niin a sawi.

ZPM Vice President C.Lalnunnema chuan, “MLA Election Campaign lai khan ZPM chu kan danglam ngam tur a ni,” tiin kan au thin a, Pathian leh mipui zarah Sawrkarna kan han chang ta a, famkim lovin duhthusam ang duak duakin thil kal lo mahse, thla reilote chhungin Chief Minister Pu Lalduhoma kaihhruai, ZPM Ministry hian ram tana thil tha tam tak a ti tawh a ni,” a ti.

Sawrkar thar hmalakna chungchang sawiin C.Lalnunnema chuan,“Kan policy ang ngeiin, MLA te mimal motor leina sawrkar suma tumsak thin chu tih tawp a ni a, CM leh Minister dangte hamthatna (facility) an neih House Hold M/R chhawr theihte pawh a zat ve-a tih hniam a lo ni ta bawk a, heng atang ringawt pawh hian Sawrkar sum thahnem tham tak kan hum thei a, inrenchemna kawngah nasa takin ke kan pen mek a ni. Tin sawrkar hmasa hun laia K. Deposit-a bill tang Rs Vbc. 425.29 lai pek chhuah a ni ta te, Health care bill leh Bill hrang hrang tangte pek chhuah a ni a, Sawrkar hnathawk ten thla tirah hlawh an la thei ta te hi Budget la pharh ve ngailo hmalakna ah chuan a ropui hle a ni, “a ti.

ZPM Vice President chuan, “Kalphung thar mipui Sawrkar hnuaiah Mizoram zirna nasa taka siam that tum a ni a, hemi atan hian tunhnaiah Casual Teacher thahnem tak, Teacher Recruitment Rules ang thlapa lak a ni a, Sawrkar hmasa hunlaia SEDP Teacher lak dan nen chuan a danglam ta hle a ni. Hei bakah hian Zirtirtu Quarters leh School Building sak chung changah pawh hma thar lak zel tum a ni a, aikal lak titawp tumin sawrkar chuan huaisen takin hma a la mek a, kan ram zirna hi nasa taka siam that tum mek a ni. Tin, Kan policy-a kan lo dah tawh angin hriselna kawngah hma kan sawn theih nan theih tawp kan chhuah zel dawn a, Medical College kan neih chhun ZMC pawh thuam chak tura hmalak mek niin, PHC ah pawh Doctor dah kim thawhkhat a ni tawh a, Universal Health Care Scheme buaipui chhoh mek a ni a, mi tin huapzo tura duan a niin Sawrkar thar hmalakna hi mipuiten a zar kan la zo chho zel dawn a ni,” a ti.