ZALEN August 28, 2023: Vawiin khan ZPM chuan party chuan an office-ah chhung inkhawm an hmang a, he huna thusawitu PL Liandinga, Consultant chuan, “Kan ram hruaituten an hnuaia eirukna an tihreh theih loh chhan chu anmahni an fihlim loh vang a ni ang tih hi ka ring a, ZPM MLA Candidate-ten 'Ka eiru ve lovang' an tih hian ka thla a timuang em em em a ni,” a ti.

PL Liandinga chuan, “April 20, 2023-a bial viltu an puanah ka tel ve a, April 23, 2023-ah damdawiin ka lut a, vawiin thlengin dam fel hlei thei lovin ka la awm a ni. Thenkhat phei chuan ZPM atanga bang tawhtein min sawi a, ka bang lo a ni tih lantir nan hrim hrim pawh vawiinah party headquarters-a thusawina hun ka chang thei hi ka lawm takzet a ni," a ti. 

PL-a chuan, "Kan hruaitute thusawi ropui ka tih em em chu, “Kan eiru ve lovang” tih hi a ni. Hman ata tawh kan ram hmasawnna daltu chu eirukna hi a ni a, eiruk loh ringawt pawh hian hmasawnna chu amahin a lokal mai a ni. Kan ram hruaituten an hnuaia eirukna an tihreh theih loh chhan chu anmahni an fihlim loh vang a ni ang tih hi ka ring tlat a ni. Ka rin hi a dika ka rin chhan pawh, ka hmuh miah loh Pathian pawh ka ring tlat a, benga ka hriat leh ka hmuhte phei chu rin sual ngaihna a awm lo a ni. Kan ram thanmawhbawk No.1 chu eirukna a ni a, No.2 pawh eirukna, No.3 pawh eirukna tho a ni,” a ti.

ZPM Party Consultant chuan, “Kan MLA Candidate-ten ‘Ka eiru lovang’ an tih chuan Mizoram hi kan khaichhuah ka ring nghet tlat a. Kan MLA-te berin an eiruk loh phawt chuan midang tan eiruk ngam a har khawp ang. ZPM kan sawrkar chuan kalphung thar hnuaiah thlai thar kan lei emaw, Sawhthing kan lei a nih pawhin thil a nih tur angin a lo thleng mai dawn a ni. Tuna kan sawrkarah pawh hian eirukna laka fihlim, MLA leh Minister ka hmu a, mahse an che thei lo," a ti. 

Sports lam chungchang sawiin, "Sports lam na takin an nawr dawn emaw tih laiin Phullem phahah an tawp leh ringawt a, kan population ngaihtuahin India rama phul lem ngah ber kan ni ringawt," a ti. 

Kalphung thar chungchang sawiin, "Kan han sawrkar ang a, khawiah nge kalphung thar chu ti a inzawh inzawh a ngai lovang. Kamrul-a tel lova sawrkar kalpui ringawt pawh kalphung thar a ni tawh dawn a, hetiang lova kan kal hian kalphung thar chu a ni mai,” a ti bawk.