ZPM MLA-ten Health Care-ah nuai 2 thleng bill phal turin sawrkar phut

Admin - Nov 14, 2021

Rs.Nuai 2 thleng senso a hmuh leh theih a ni

Aizawl: Zo People’s Movement (ZPM) Legislature Party chuan Mizoram State Health Care Scheme hnuaia inziak lut mekte tan an inenkawlna senso Rs. Nuai 2 thlenga bill let phalsak turin sawrkar an phut a. Tuna bill tang mek eng emaw zat awm pawh an pek theih loh chhan mumal taka mipuite hnena tar lang turin an phut tih an sawi bawk.

Nimin khan thuchhuah siamin ZPM LP chuan MNF ministry tharin October, 2019 atang khan Health Care Scheme thar an hmanah inziah luh manah kum khat atan Rs.100 (BPL) leh Rs.1,000 (APL) pekin Rs.Nuai 2 thleng senso a hmuh leh theih a ni.

October atanga a hun chhiar thin chu sorkar kum calendar (April – March) anga kalpui tum a nih avangin tunah hian October, 2021 - March, 2022 chhung atan Rs. 50 (BPL) leh Rs. 500 (APL) inziahluhna manah lak a niin Rs. Nuai 1 thleng chauh damlo inenkawlna senso a hmuh let theih dawn ta tih an sawi a. 

“Thla 12 atana Rs.100 kan pek kha, a hun pawhsei a ngaih tak avangin, tuna thla ruk atan Rs.50/500 pek hi a awm kan ti hle a; amaherawhchu, damlohna senso bill let tur Rs.Nuai 1-a a tla thla hi hriatthiam har kan ti a. A hmaa kan pek dan nena khaikhin chuan Rs. Nuai 1 bill-na tur chuan inziah luhna atan Rs.25 (BPL) emaw Rs.250 (APL) tur ni awm tak a ni,” an ti a. “Assembly zawhna chhannaah MSHCS Corpus Fund hnuaiah hian Rs. Nuai 20,000 chuang a la awm a ni.

Mipuite Covid-19 hripuiiin min tihretheih lai mek leh sum awm reng chung si a, damlote tana bill let tur a chanvea an tihniam hi mipuite tana harsatna lian tak a ni hi kan dem tak zet a. Chief Minister in hahipa Assembly Session lama SEDP hnuaia damlo apiang ten an dawn tur Rs. 2,00,000 theuh dah a nih thua sawi nen a inpersan ta hle a. Tunah hian MSHCS hnuaiah Rs. Nuai 4,400 ba la pek theih loh an nei a. Hei pawh hi mipuite harsatna hrethiam a, mipuite hnena pechhuak vat turin kan phut tlat a ni," an ti.

ZPM Legislature Party chuan damlote'n damdawiin an chhuahsan dawnin bill an pek tlak vek a ngai tih an sawi bawk a. MSHCS lama bill an thehluh hian hun rei tak nghah a ngai leh si thin hi thil manganthlak tak a nih bakah mipuite phurrit belhchhahna a ni a. Dam lo na/chau zualte phei chu rei loteah damdawiin lama luh an lo mamawh leh thin. Chhungte leh thenrual thate sum puk chawpin an han invawmlut ve rawih zel a. Inthlahrung taka hun an hman lai hian MNF ministry hian Restricted Tender leh Tender pawh awm lova Contract inpek an thulh leh chuang si lo a. Sum awm sa hnuaia pawisa pechhuak thei lo khan Party worker ho Contract an hlui thei reng bawk si hi ka hre thiam thei lo va. Tuirial By-Election neih mekah pawh phullem phah thlengin an tiam leh mai thei te kha mipuite zahlohna dik tak a niin kan hria a ni, an ti bawk.

Share now