Aizawl: Mizoram Peoples Conference (MPC) party Treasurer V. Lalthazuala chuan ZPM nen an thawhhona chu automatic-in a tawp tih a sawi.

Nimin khan Aizawl Press Club-ah chanchinbu mite kawmin MPC Treasurer V.Lalthazuala chuan ZPM chu political party te, ram vei pawl leh mimal tu pawh sawrkar thar piantir duh apiangte tel theihna tura siam a ni tih sawiin, “Mahni party leh pawl thiat kher lova grand alliance anga thawhhona hi hlawhtling thaw khat hle ah kan ngai a, hun tepter takah MLA 8 kan nei thei a ni. Hei hian party leh pawl thiat kher lova thawhhona a hlawhtlinzia a tichiang hle a ni,” a ti.

MPC Treasurer chuan ZPM-in registration a tifel chu an lawmpui tih sawiin, “ZPM anga thawhhona thuthlung kan neih kha kalpui zel kan duh laiin ZPM chu political party pakhat a lo nih tak siah chuan Tangrual Pawl nihna a lo tawp ta a ni,” a ti a. MPC chu thawhho tawhnaah an lungawi thu leh party thiat kher lova thawhhona chu chhawmnung zel turin MPC chuan a theih ang zawng zawng ti turin a inhuam niin a sawi bawk.

MLA-te awm zel dan tur chungchang zawhna chhangin, “Independent MLA an ni a, ZPM emaw, MPC emaw pawh nise an zawm thei lo a, an chungah thuneihna kan nei lo a ni,” a ti bawk.

MPC party thu-puan chungchangah hian MPC (ZPM) party atanga MLA thlantlin, Aizawl West III bialtu V.L. Zaithanzama chuan engmah an hre ve lo niin Zalen palai a hrilh a, “He thilah hian min rawn lem lo a, engmah min hrilh loh bakah kan party Vice President pawhin engmah a hre lo a ni,” a ti.