Aizawl April 6, 2024 : Mizo National Front party chuan ZPM sawrkarin ni 100 programme a siamah kuthnathawktute thlai thar lei an tum thu an sawi a; mahse, an hlawhchham leh si avangin beiseina sang tak nena thlirtute an tibeidawng nasa hle niin an sawi.

Nimin khan Aizawl Press Club-ah chanchinbumite kawmin MNF General Secretary VL Kroshnehzova chuan, “ZPM hian an sawrkar hma khan thlai thar - hmunphiah, sawhthing, aieng leh hmarcha chu a man tur nen lam tar langin lei an tum thu an sawi a. Sawrkarna an chan hnu ni 100 programme-ah pawh tar langin, Asembly Budget Session an neih hmasak berah governor an sawichhuahtir a, chu mai ni lovin kumin Republic Day-ah pawh governor hi an la sawichhuahtir nawn leh a. Hei mai bakah hian Chief Minister Lalduhoma chuan thlai thar leina tur vaibelchhe 110 dah a nih thu a sawi bawk a. Hetiang a nih lai hian thlai thar an lei thawm hriat tur a awm ta rih lo a ni,” a ti. 

Hmunphiah chungchang sawiin, “Hmunphiah hi Vairengte chhehvelah ringawt pawh quintal 30,000 bawr vel tharin, heng hi a hringin kg-ah Rs. 50-62/-in an hralh thin a. Kumin hian ni hnih bawr vel an hralh hman tihah sawrkar hmalak tumna avangin thil a kal buai zo ta a. A rate rawn tlahniam tain a sengnaa an senso thin, kg-a 25 aia sangin a hralh theih ta lo va, hei vang hian ui tak chungin a thlawnin an thlir liam ta a ni,” a ti a. Vairengte chhehvelin kumin ringawta hmunphiah an hralh thei (nuai sangkhat za leh sawmpakhat) lai a tling niin a sawi bawk.

VL Kroshnehzova chuan, “Tuna kan hmuh chinah chuan ZPM sawrkar hian mipui beisei a pha lo hle a, thlai thar lei tura ni 100 programme-a an sawi leh a taka an hnathawh hi mark pe dawn ila, pek tur a awm lo a. Kuthnathawktute thlai thar leisak tura intiam siin, an mittui titlatu-ah an tang ta zawk hi MNF party chuan pawi a tiin, rim taka thawktu kuthnathawktute a tawrhpui tak zet a ni,” a ti bawk.