ZALEN January 31, 2025 : Mizoram Pradesh Congress Committee chuan Congress Bhavan, Aizawl-ah vawiin khan Friday Political Session leh Lawmluh programme an hmang a, mithar 208 lawmluhna a nei a, he huna thusawitu MPCC President Lal Thanzara chuan sawrkarah beiseina a sang lo hle niin a sawi.

Lal Thanzara chuan sawrkar mekah beisei a sang lo nia a hriat thu sawiin, "Congress party in ram rotling kan siam Tuirial Hydel project te, Lengpui Airport te, medical College te hi ZPM party hian enkawl thiam lovin tihral an tum mek a ni.

"Medical college kan neih chhun pawh central hlan mai an tum a, central in kan lo enkawlpui ang che u an ti a, an hlan lo mai a ni. MNF-in medical college hming an thlak a, ZPM in a hming an thlak leh a. Pathian leh mipui zarah kan sawrkar leh a, kan hotu ten rem an tih chuan a hming ngai Mizoram Institute of Medical Education and Research (MIMER) tiin kan thlak leh ang. Medical college ringawt ni lo Research tih nana kan din a ni.

"Congress sawrkar lai khan Lengpui airport IAF hnenah hlan an lo tum ve tawh tiin an sawi thin a. Kum 2015 ah Congress sawrkar laiin kan Governor MM Lakhera khan IAF a hlan a that ringin lehkha a ziak a, chumi dungthul chuan Chief Minister pawhin lehkha a ziak a. Mahse, karkhata hnuah Chief Minister in a lehkha ziah chu a sut leh nghal a ni. Governor in a rawtna chu, 'a tha ang a' an tih kha, a thatloh tur zia hrechhuak lehin an karkhat chhungin an sut leh a ni.

"ZPM sawrkar hian ram rorelnaah pathian ram thlentir an tum thu an sawi a. Mahse, tunah hi chuan Pathian ram ni lovin ZPM ram an thlentir mek a ni.

"Kan airport neih chhun te min hralhsak hma in ZPM hi kan hralh vat a ngai a ni. Kan ramah sum leng vak a tlem em em reng a, kumin Krismas kha ruaitheh tlem ber tum an ti a, sum leng vak a tlem tlat a, sumdawng te pawhin inhralh a har an ti a ni. Eng vang nge kan tih chuan sawhthing lei nan sum an dahtha a ni. Sawhthing lei nana development sum an dah tha a nih chuan a hriatthiam theih mai a. Mahse, Central BJP te duhdana an awm hma chuan pawisa puk ngaia an buai an buai a ngai," a ti bawk.