Aizawl August 20, 2024 : School Education Department-in School chawlh a puan chu zirlai, zirtirtu leh zirlai nu leh pa ten school compound an thlen hnuah leh kal kawngahte an hriat chauh avangin fate thlah leh lam a ruala tih a ngai a, Aizawl khawpuiah Traffic Jam a nasat phah a, mipui buaina a siam sak Congress Thalai chuan an ti.

MPYCC chuan, "July ni 2.2024 (Thawhlehni) khan School Education Department chuan Disaster Management & Rehabilitation Department thurawn angin school chawlh a lo puang thut tawh bawk a. School chawlh puan hi Social Media-ah 9:00 A.M. rik hma deuha darh chauh a nih avangin Zirtirtute, zirlai nu leh pa leh zirlaite buaina nasa takin a lo siam tawh a ni," an ti.

"Tlai khawhnua sawrkar-in School chawlh a puan thut thut avang hian zirlaite nikhat tiffin ei man, zirlaite school-a thlah leh hruai hawna manah sum thahnem tak a luangral a. Hemi avang hian zirtirtu leh nu leh pa tamtak chu sawrkar thil tih danah an lawm lo a ni," an ti bawk.