ZALEN January 30, 2025 : Mizo Hnam Runah chhung inkhawma thusawitu MNF Publicity Board Vice Chairman J. Sawma Vanchhawng chuan ZPM sawrkarin Zoram mipuite laka thuneihna a lek dan a him loh a ti a, Dan rorelna Judiciary rintlak leh viak tha tak awm lo phei se chuan ZPM sawrkarah Myanmar mipui ang maia rahbehin mipui a awm theih thu a sawi.

J. Sawma chuan, "ZPM sawrkarin kum khat leh thla hnihah a thuneihna hmanga mipui min palzutna leh min rahbehna a thleng tam ta hle. ZPM sawrkar hnuaiah ZPM ni ve lo, pawl dang reng reng ngaihtheih lohna leh ngaihdan dang neite rahbeh leh nuaibo vek tuma hmalakna hmuh tur a awm chho mawlh mawlh hi a vanduaithlak tak zet a. Mipui rorelna, Democracy pawng nekna langsar tak tak thleng mek karah hian Zoram mipuiten ngaihtuahna fim tak kan hman a tul ta hle," a ti.

Mipui rorelna ti nghettu leh ti mawitu chu ngaihdan inang lo neite inzah tawn thiamna hi a ni. ZPM sawrkar erawh chuan an rilru ang pu mi ni ve lote reng reng nuaibo leh rah beh an tum ta zel tih a lang thei a. Nimin maiah pawh ZPM sawrkarin a thuneihna hmang suala Hnahlan leh Thekpui Village Council-te a thiahna thupek chu Gauhati High Court Aizawl Bench-in a paihsak tawl mai a. Dan rorelna, Judiciary hmanga khalh ngil ngai khawpa ZPM sawrkarin a thuneihna a hmangsual nasa nghal ta mai hi mipui rorelna, democracy ramah chuan thil zahthlak tawp a tling, a ti a.

MNF General Secretary chuan, "VC leh LC te term pawh tawi thut anih chhan hi ZPM sawrkarin 'mipui sawrkar' letling chiah, 'Party sawrkar' sawhngheh a tumna a ni tih hi a chiang em em a, phat theih a ni lo. Inthlan hun atan remchang deuh zawk pawh an nghak thleng ngam tawh lova, HSLC leh HSSLC exam hun nen a in ti buai dawn tih hre reng chung pawhin, VC leh LC hmanga party sawrkar sawhngheh tumin, tunah hian hnawhsarum takin min inthlan luihpui an tum ta a ni."

"Tuna an campaign au hla ber, CM ber pawhin Thenzawla a va sawi, ‘sawrkar lai thawhpui thei tur VC leh LC neih a tul’ tih hi ‘ZPM VC leh LC ni lote chu thawhpui kan tum lo’ tihna emaw, ‘Thawhpui harsa kan ti’ tih emaw nen a intluk a. Hei hi mipui rorelna kalphung kalh, a lang a pauva democracy beihna dik tak a nih avangin Zoram mipuite hian VC leh LC inthlanna neih tur hmang hian Democracy vawnghim turin MNF candidate te an vote a tul hle," a ti.

J. Sawma chuan, "Lengpui Airport chungchangah IAF kuta hlan turin thutlukna an lo siam fel ti tih der mai a. ZPM sawrkar lo din tirh, December ni 14, 2023 khan Council of ministers thukhawm chuan zirchianna mumal nei hmasa lovin "Lengpui Airport chu AAI hnena hlan turin hmalak a ni ang a. ZMC pawh central sawrkar kuta hlan tura hmalak a ni ang" tih an pass nghal tawp mai.

"January 6, 2024-a CM Delhi leh Kolkata a tlawh hnua a lo haw khan chanchinbumite hmaah Lengpui Airport chu 'AAI emaw, Adani group kutah emaw kan pe dawn a, Civil Aviation Ministry in min buaipui dawn a, a tu hnenah nge pe ila tha zawk ang tih kan zir chiang dawn a, Adani Group phei chuan ka hnenah DO letter an rawn ziak tawh a. A rang thei ang berin hlan kan duh' tih a puang a. February 2024 ah Working Committee an din zui a, a tirah CM berin AAI emaw Adani Group kutah emaw kan pe dawn a tih laiin, Working Committee chuan IAF kuta hlan an lo rawt ta mauh mai a ni" a ti bawk.