Aizawl February 6, 2023: ZPM Thalai chuan February ni 4, 2023 khan Thalai President Dr. C. Lalrammawia hovin Lengpui Airport an tlawh a, an tlawh tum hian GAD atangin Airport Terminal chhungah thlalak an phal sak lo chu mak an tih thu thuchhuah an siamah an tarlang a, MNF sawrkar chu Airport an sak dan zahpuiah an puh.

ZPM Thalai chuan Lengpui Airport-a thlawhnaa zinte harsatna, trolley indaihloh leh thil dang chungchang an auchhuahpui tawh chuan ngaihsak a hlawh tawk lo tiin, pawi an tih thu a sawi a, mipui ngai pawimawh lohnaaah an ngaih thu an sawi. Lengpui Airport kan tlawh leh tum hian GAD lamin Airport Terminal chhungah thlalak an phal lo chu mak an tih thu sawiin, MNF sawrkar-in Lengpui Airport an sak dan hi an zahpui ta em ni? an ti.

ZPM Thalai chuan, "Luggage trolley 22 chiah hman tur a awm a, insak bungrua thiarnaa hman a nih avanga trolley tam tak chhia a awmte hi pawi kan ti a, chu bakah sum tam tak senralna Airport sak hna muang lutuk leh a hna chhe lutuk hi a pawi. G-20 summit March ni 2-a kan thlen turah hian MNF sawrkar hian Mizoram mipuite Lengpui Airport hnathawh muang leh chhia avang hian min mualpho mai ang tih kan hlau a. Lengpui Airport hi duhsak zawngte sum insiamna atan hmang lovin ram rohlu siamna atan hmang turin MNF sawrkâr kan ngen a ni," an ti.