Aizawl: ZPM Party chuan October 2020-a Assam in Mizoram min rawn nek avânga buaina chhuakah mahni nunna thâpa Mizo mipui thawk chhuakte chungah lawmthu an sawi a, a bîkin Vairengte khawtlâng leh MZP-te inpekna a ropuiin, chawimawina nopui dawmtir an phu tak zet a ni, an ti.

Thuchhuah an siamah ZPM Thalai chuan Vairengte khawtlâng mipuite leh MZP te hmalâkna avânga Vairengte dai, Auto Stand thlanga bûk sak zawh a lo ni ta hialte hi ropui kan ti a, an hmalakna avâng liau liaua tun tum ramri buainaah hian Zoram hi chhanhima awm kan ni tih hi Zoram mipuite hian kan hriatpui a ni.

ZPM Party thalai Headquarters chuan tun boruak atang khan Vairengte mipui leh MZP te hian kan ram chhan nan chuan ui an neih lohzia leh mahni nunna hial pawh hlan an huamzia a lang chiang hle niin kan hria a. Ram min petu leh hnama min dintu Pathian hming kan tihmualpho loh nan, Vairengte khawtlâng mipui leh MZP te anga ram leh hnam chhana nghet taka ding turin Zoram mipui zawng zawng ZPM Party thalai chuan kan ngen tak meuh a ni, an ti bawk.