Aizawl: Mizoramin state dang atanga châk a lakna ber Vairengte kaltlangin zu khap hnuah zu tam tham man a la awm lo a, helai hmuna duty Excise & Narcotics department chuan khualzin phur bus leh maxi cab driver te chu zu an in leh in loh an check uluk bik thu an sawi.

Zalen palai zawhna chhangin Vairengte-a Excise & Narcotics thawktute chuan darkar 24 an duty chungin zu khap hnuah tum khat sangha hnuaia dah zu case 80 an man bak chu tam tham man an la nei lo tih an sawi. Excise thawktute chuan section 3-ah inthenin section khat zel chuan 24hrs thawkin a tukah an awl veleh thin niin an sawi a, “Kan indaih loh em avang hian damlo leh chawl an awmte hian kan buai thei hle a, lirthei lut a tam avangin lirthei zawng zawng lipse vek tur chuan a rei dawn lutuk avangin kan tan tihngaihna a awm lo a. Case la char char tur phei chuan Kolasibah kalpui zel a ngai a, gypsy 1 chauh kan nei a, driver a awm loh avangin constable tu emaw berin a khalh a ngai a, a buaithlak hle a ni,” an ti. Vairengte kaltlang hian ni tin lirthei 450 atanga 490 vel lo lut thin anga chhut a ni.

Excise thawktute chuan lirthei khalhtu zingah bus leh maxi cab khalhtute chu an check uluk bik zual niin an sawi a, breath analyser (zu ruih leh ruih loh enna) pawh an hmang rim hle nia sawiin a kuang pawh sawrkar supply bakah anmahni sum sengin an lei thin thin an sawi a, “Passenger phur driver te hi kan strict bik avangin a chuangte tan pawh a him a, tun hmaa zu nam thin te pawh an nam tawh lo a ni,” an ti bawk. Mizoram atanga Assam khaw hnai ber Lailapur-ah hian Mizorama zu phalrai a nih lai khan zu dawr a awm lo a, khap a nih hnuah 1 chu a inhawng leh a ni.

Excise & Narcotics thawktute chuan Aizawl leh hmundang atangin Bhaga chhehvela dam-dawi ti leh leia lokal an awm thin tih sawiin hei hian hna a siam tam hle tih an sawi a. Drug tirem tur hian Dholai a tlawmngai pawl Voice Against Social Evil (VASE), tun hmaa Young Muslim Association (YMA)invuah te nen tang tlangin theihtawpin hma an la tih an sawi. hei bakah hian tunhnai thla 2/1 kalta atang khan Shillong atangin zirlai thenkhatten ganja hawn an ching niin an sawi a. Zirlai bakah hian address pawh inziak lemloa inthawn a awm fo tih sawiin engemaw zat chu an man niin an sawi bawk.

Mizorama zu luh tam loh chhan chu Assam sawrkarin dan a siamah mi pakhatin tum khatah case 1 aia tam lei a phal loh vang nia rin a ni a. Hetih lai hian Vairengte baka state dang pawhtu Bairabi, Phaisen leh Saiphai kaltlangin zu hi phurhluh anih leh nih loh hriat a ni lo a. Heng hmunah te hian Police duty awm mahse Excise te an duty loh avangin Police hi chuan uluk takin an dap lemlo nia thudawn a ni. Hetih lai vek hian Aizawl ah a senchi (IMFL) chu a to hle niin an sawi a, hei hian state dang atangin a lut tam lo tih a entir niin mi thil chikmi tak pakhat chuan a sawi.

Sawrkar ruahmanna angin Vairengtea check gate te hi a remchan dan angin sawikhawm an ni a, a tirah Police checkgate ah Police, Excise leh Forest te dah an ni a. Mahse, a hmunhmain a zawh loh avang leh check chhung a rei avangin Excise hi an hmun ngaiah lettir leh an ni a. Taxation checkgate thinah Taxation, Supply, Commerce leh Vety department te dah an ni.