Gauhati High Court, Aizawl Bench chuan May 27, 2019 thleng an zu kawl laite tihral nan zu zuarte Mizoramah zu zawrh chhunzawm leh a phalsak. Nimin khan High Court hian thuremna tichhuakin Mizoram sawrkarin zu khapna dan a kalpui chu thiatin May 27, 2019 thleng zawrh chhunzawm leh a phalsak a, sawrkar chu order chhuah atanga kar khat chhungin zu zuar te license tinung leh vek turin a hriattir. Gauhati High Court thuchhuak chuan ni 29.1.2019 a sawrkarin hun rei tak zu hralh loh ni ‘dry day’ a puan khinna chungchanga thutlukna a siam hnuah Mizoram sawrkar chuan ni 26.02.2019 khan zu lakluh phalna hi a pekchhuah bakah zu atangin chhiah a la reng bawk a. Hei mai ni lovin Mizoram sawrkarin April 1, 2019 atanga zu khap a tum chu model code of conduct hman a nih tawh avanga awmze nei lo a nih thu Addl. CEO chuan a hriattir niin a sawi a, hei vang hian MLPC Act chu a la dingchang reng a ni a ti. Court thuchhuak tarlan danin tun dinhmunah zu dawr neitute hian zu kawl lai Rs. 14,59,11,074.12 man an nei a ni.