ZALEN Oct. 28, 2024; Chhiat tawk (Mitthi) an awm a, YMA lamin 'Zualko' thu post an siamah tih dan a inang lo zung a, thenkhatin 'thih chhan' an tarlan tel laiin, tarlang tel ngai lo an awm bawk. A eng zawk nge tha a kan hriat le...?

Tun hma angin zualko tura lam kal intirh a ngai tawh lo a, telephone leh social media hrang hrang hman tangkai a ni tawh a, vengchhung-ah microphone hmangin puan a ni thin bawk.

Hengte hi khawvel changkanna in a ken tel a ni a, a awlsam a a tha hle a, a thleng rang em em bawk. Hetihlai hian social media a zualko thu thehdarh a nih thin danah erawh tih dan phung inang lo a awm zung a, YMA tam takin, zualko post an siamah thih chhan an tarlang ngai tawh lo a, chumi letling chiah chuan tarlang thin YMA branch engemawzah an awm bawk.

Thih chhan tarlan leh tarlan loh chungchang hian social media lamah inhnialna a chawh chhuah chang pawh a awm leh thin a, engnge dik leh tha zawk tih hriatthiam a har. Inkaihhruaina inang tlang a awm lem lo niin a lang bawk. Engpawhnise, hemi chungchang hi rualkhaia kal theih a that rualin ngaihdan erawh a inang thei dawn lo. Inkaihhruaina inang tlang pawh neih a harsa in a rinawm.

Zualko thu an thehdarhah eng ang pawh a tarlan nise, a pawimawh ber chu post lo hmutu ten kan hria, an hming, veng leh kum zat, thih ni leh hun te. Kan hriat tur chin tarlan bak lo hriat belh viau tum lo i la, kimchang taka an thih chhan tarlan a nih pawhin, tarlang ve lo te nen khaikhin zel tum lo bawk i la a tha mai awm e. Bakah phone hmang pawhin awlsam taka inzawh mai theih a ni bawk.

Fiamthu a 'i hriat tur pawimawh chu in veng tlangau in a rawn au mai ang,' an tih thin hi a dik thui viau a ni.!