Kum a tlem ta lo a ni ang e. Type writer khawih a nuam ta lo. Engle khawle, hei ka han ‘KA HUANG’ leh ta ngawt chu a nia.

Khirmas a hnai a, kum 1974 tlaivar zante ka hre chhuak rum rum mai. 31st December 1974 zan khan kan kawmchhakpa - Biakzaua (RIP) nen kan kawta tlaivar tumin Rum bawtawl khan emaw kan nei ve ran mai a, a thiannu lah chu nau nei mai dinhmunah a ding a; mahse, kan ngaihsak lem lo. Tichuan, zanlai a lo ni a, keini pahnih chuan petrol tin ruak kan neih chhun chu kan vaw bur bur mai a, kan lâm a (hei hi kan kawt khawlai zawl a ni). Tichuan, zanlai velah chuan ka thianpa nupui chuan nau, hmeichhia a hring ta a; mahse, kan han ngaihsak lem lo. A hming ka ral saksak a, a pa hming Biakzaua leh a nu, Sapmawii hming kaikawpin Biakmawii ka sa a, hei pasal tha tak, veng tana mi tangkai, sawrkhar hnathawk lehnghal a nei tawh nia! Ka ngaihdan chuan nimin lawk kha ni maiin ka hria a, kum 45 lai a lo ni der ta mai! Kan bengchheng chu min rawn hau deuh mah se ka thianpa chuan RIMAWI VENG a nih hi a ti mai a, kan ri zankhua zak a ni. Chuvang chuan kan veng hian tun thlengin RIMAWI VENG tih a pu zuk nia, hman deuh khan kan veng hming sak thuhlaah paho 41 kan inkhawm a, a thenin Mual Veng tih an duh a, a thenin Rimawi Veng, vote kan la a, Rimawi Veng duh kan tam zawk avangin RIMAWI VENG tih a pu hlen ta a nih hi.

Chhawrtui khaw hming put chhan pawh khi mak angreng tak a ni. Khi tuikhur khi lungkuang niin, tui a tam lo hle a ni awm a, thalah chuan a lung bang behchhan ngawr ngawra thal theih chauh a ni awm e. Nu pakhatin a lo thal kun ngawr ngawr hi pa pakhat, thing lukham pu haw lam hian a hmu a, a kaihza khawivalawi leh a mal var tak mai chu a it ta sia, chu nu kun lai chu a thing lukham put lai dahin, a hnung lam atangin a bei ta mai a. Chu nu chuan tihngaihna dang nei chuang hek lo, dawh mai loh chu. A inpeih veleh a biru bo a, chu nu chu lungawi lo zetin a lo ding chhuak a, a thinrim lai chuan chu pa chuan hre lo ni awm takin a zawt vel a; tichuan, an zawng dun vel ta a ni an ti. Chu nu mangang chuan, “Tih dan thiam,” ti tein a au vak vak mai a, chhangtu awm hek lo. A pawltu ber chu a zawngtu a ni mauh si. A tawpah chu pa chuan, “A tlan bo daih tawh ang, hawh i hawnsan mai ang, a thing lukham hi ka’n neihsak daih ang e,” tiin ama thing lukham chu amah bawk chuan a pu hawng leh ta an tih chu. Chuvang chuan chu pa chuan a chhawng tangkai em a, CHHAWRTUI an ti ta an tia lawm.