Kan kohhran-in ruihhlo ngaite pualin kar hnih chhung gospel camping kan buatsaih a, senso pawh a tam tham fu mai. He camping-ah hian a tirah mi 115 an lut a; Amaherawhchu, ‘Pakhat zela an kal boin, an kiam thin chhungkaw tinreng’ tih hla ang deuh khan an chhuak pheuh pheuh a, a tawp thlenga awm tluan chhuak chu mi 63 chauh an ni. Security duty pawh a hautak a, kei tak ngial pawh zan khat ka duty ve a, ka thawh hlawk lem lo khawp mai. Ka duty ve chhung reiloteah pawh mi 5 an chhuak hman a ni. An ruihhlo chakna a nasa tawh si a, chhuah an dil ngawih ngawih a, duty te tan pawh tihngaihna tak a awm chuang lo. Kan han dang deuh a, pakhat chuan gate a zuan khum zawk mai maw le!

Kohhran-in sum leh pai, tha leh zung tam tak a seng a, tha chhuak a mual pawh an awm mahna. Chutihrualin an vai erawh chuan an sim hlen kher lo ang. Kohhran Upa pakhat sawi danin, camp chhuah tlai atanga damdawi zawng nghal leh ruih leh nghal te pawh an awm a ni. Damdawi zuar te lah an chimawm na rawh e. Damdawi ti thin (drug addict) an tlem chuan an sum lak luh a tlem dawn tih an hria a, camp chhuak piangthar hlim te chu an inkhawm kal tur te an lo chang a, supply talh zuk tuma maw le! Mi thisena eizawng, mi chhiathlenna tur pawh pawisalo tute hi he khawvelah hian an hmuingil reng lo vang. 

Kan kohhran-in ruihhlo ngai te pual gospel camping a buatsaihah hian kan kohhran mite chauh an lut lo a, veng dang leh kohhran dang atang pawhin engemaw zat an rawn lut bawk a, chutih rualin campers tam zawk chu kan kohhran a lawi thin te an ni. Kohhran pakhatin ruihhlo ngai te pual gospel camping a buatsaihah ruihhlo ngai heti zat lut tur an awm hian ngaihtuahna a ti thui khawp mai. Heti em hian a ni maw kan ramah ruihhlo a lo hluar mai le!

Engvangin nge kan ramah hian heti tak ruihhlo a hluar tak mai le? Hmasawnnain a ken tel a ni a, mi ramah pawh ruihhlo a hluar ve tho, an thalai te zingah pawh addict an tam ve tho kan ti a ni mai thei. Amaherawhchu, Mizoram anga khawtlang leh ram pumin a buaipui leh tlawmngai pawl lian berin thapui thawha a do ngai khawpa ruihhlo hluarna hi khawvel ram dangah a awm lo mai thei. Kan Indian pui, vai kan tih te hi an tam ang huin ruihhlo laka talbuai hi an thalai te zingah an tam hmel loh tlat. Kel ek tama tam an ni a, an thalai te zingah ruihhlo ngawlvei chu lo awm ve bawk mahse, an khawtlang nunphung chawk buai tham an ni kher lo ang. 

Keini erawh ruihhlo hian kan khawtlang nun ralmuanna thlengin a nghawng pha tlat mai. Ruihhlo vangin ruk ruk a hluar em em a, thil bo a tam a, bo thei lo pawh a awm ta mang lo. Chawlhni chawhma, mipui nawlpui inkhawm tam vanglai tak te hi rukru te chet duh hun a ni a, in nghak pakhat tal indah loh chuan lungmuangin kan inkhawm thei ta mang lo. Mahni inah CCTV kan vuah ta fur mai.

Mihring hi nasa taka zirtir ngai kan ni a, kan seilenna chhungkua, kan tlakna leilung a zirin nasa takin kan danglam thin. Ruihhlo addict tur te, zu ngawl vei tur te, nawhchizuar tur te, HIV/Aids vei tur tein kan piang ngawt lo. Kan seilenna chhungkua a zirin nasa takin kan nun a danglam thei thung. Buh chi thehtu khan buh chi chhia leh buh chi tha a thliar hrang lo a, buh chi inang vek a theh a ni. Buh chi thuhmun theuh theuh, that dan inang theuh theuh, rah chhuah thuhmun vek mai awm. Mahse, a ni miah lo.  Buh chi thenkhat chu a leh za tein an rah a, thenkhat erawh rah chhuah hman loin an rawp ral thung. Eng vang nge? An tlakna leilungin a zir loh vang a ni. Buh chi tha tak pawh pialtlep lei pana a tlak miau chuan zung a kaih thei tak tak lo. Ni a lo tlangsang a, a vuai a, a thi mai thin. Hnim hling nei zinga tla chuan diptu a ngah a, damkhawchhuah ngaihna a awm lo a ni. Tlakna leilung, seilenna chhungkuain a zir loh vanga nun hloh ta hi an va tam em!

Sawi leh sawi hnu, mihring hi thil siam zawng zawng zing-ah chungnung ber ni mah ila nasa tak zirtir ngai kan ni a, kan danglam bik a ni. Thil siam dang te erawh an ni ve lo. Zirtir leh kaihhruai vak pawh an ngai ve lo. Mizoram leh khawvel letliama sakhi hi an huk dan a inang reng. An ei duh zawng leh tui tih zawng pawh a inang reng. Mihring te erawh nasa tak zirtir ngai, enkawl ngai leh kaihhruai ngai kan ni a; Chuvangin kan fate hi ruihhlo laka fihlim tura kan duh chuan an naupan lai atangin an rilruah ruihhlo that loh zia kan tuh ngheh a tul a ni. Helam hawi inzirtirna hi naupang zirlaibuah pawh telh theih nise a tha khawp ang. Ruihhlo chungchang chauh ni lo, nun dan tha kawng tinrengah naupang te hian zirtir leh kaihhruai an ngai tak zet a, nungchang mawi leh tha, mi biakna tawngkam hawihhawm te, aia upa te zah, nu leh pa leh zirtirtute thuawih pawimawhna te hi an naupan lai atangin an rilruah tuh ngheh kan tum tur a ni. 

Puitlin hnuah, nih tur ang nih vek tawh hnuah, a pawi tur ang a pawi zawh vek tawh hnuah a ler atanga thuai a, gospel camping leh rescue home hmanga in chhanchhuah tum chu a hautakin a sawt mawh tawh em mai.