Kamchhuak

A ring apiang a ni ngawt lo

K. Lalrinchhana - Nov 14, 2021

Miin Pathian hmaa a rilru tak tak a bun chhuak ngat a nih chuan sawi tur a van pharh mai a, chham tur a tawi tak a, a sawi chhun erawh a tak a ni. A awki sang lo mah se tihderna leh lemchanna tel hlek loa thinlung chhungril atanga tawngtaina chuan Pathian lalthutthleng a nghawr che thin.

Mihring hi kan inang lo viau mai a, thenkhat thu sawi thiam tak, tawngkam thiam tak, mi hmaa din leh thusawi nuam ti tak an awm a. Mi thenkhat erawh thusawi thiam lo tak, tawngkam thiam lo tak, mipui huhang ngam lo tak, a tul hunah pawh mipui hmaa din leh thusawi hreh em em an awm bawk a, in dem ngawt theih a ni lo. Pa pakhat pawh a fanuin pasal a nei dawn a, ‘Joint reception-ah tal chuan thu i sawi ang chu’ an ti dek dek a, “Thu ka sawi ai chuan inru mai rawh se” zuk ti a! Mi hmaa thusawi chu a hreh ve ngang ni tur a ni.

Mipui hmaa tawngtaite pawh thenkhatin an huphurh em em a, thenkhatin an hnehsawh em em thung a, an tawngkam thiamzia show-na remchangah an hmang ta emaw tih mai tur a ni. Pastor pakhat tawngtai pawhin a han thlep no kual kawi nasa khawp a, “A khi kham rang sen vung, Zuk sa leh Thari (sathar) te tualchaina, duat taka an no sen te an chawilenna hmun, hringmi tan lah lawn theih rual ni si lo maw Lalpaaa...” a ti e, an ti. A tawngtaina lo dawngsawngtu ni ta ila, lawm tur nge lawm loh tur tih pawh hriatthiam a har viau mai thei. Chief Minister hnenah hian thil dil dawn ila, a hmaah thu ran mai ila, “Ram leh hnam hmangaih luat vanga thosi leh vangvat karah kum 20 rammu tawh hnu, riltam hrehawm tam tak tuara rawtuai leh hnim hnah mai maia in hnawh puar a, piallei dai bel thintu, heng zawng zawng hi ram leh hnam i hmangaih vanga i tawrh a ni si a maw ka pu Ram” han ti hmasa ta duah ila, CM chu a lawm ang em le? ‘He pa hi a tial a thawl deuh a ni ang a’ a ti rilru mai thei. A nih loh vek pawhin, “Hun ka ngah lo a nia, i sawi tum chu sawi thuai teh,” a ti fak mai thei.

A ni lah taka, mi thenkhat tawngtai hi chuan Pathian hi an counselling ta hrep emaw tih mai tur a ni, an hrilh hrep zel mai. A hmangaihna sanzia te, kan sual chung chung pawha min khawngaih a, min ngaihdam zel dan te, kan tih tel miah loa khawngaihna vang liau liaua min chhandamzia te, thil tih avang ni lo, rinna avang liau liaua chhandam kan nih mai dan te an hrilh hrep phawt a, chumi hnuah an duh leh mamawhte an thlen ta chauh thin a ni. Pathian hi tawngkam thiamna hmanga tlawn lungawi hmasak tum te pawh kan ang rum rum mai. 

Thawhlawm hlan tura sawm kan nih chuan fel takin thawhlawm hlanin tawngtai mai ila, a tawk viau mai. Chuti ni loa, ‘Hetiang hun hi a khat a, i han bei nghek teh ang’ ti ni awm hrima khawvel ram pum puia corona virus vei zawng zawng tan te, tlang hrang hranga rinnaa kan unaute tan te, tihduhdahna leh hnehchhiahna tuar mek zawng zawng tante kan han dil tete a, chumi hnuah kan kohhranah thlarau thianghlim a lo zalen zel theih nan te, harhna kan chan theih nan te kan han dil leh a, Kohhran Upa  leh Kohhran Hmeichhia, Thalai hriatute tan kan han dil leh chiam a, a tawpah thawh lam kan hlan hram thin. Chutah pawh tun aia tam leh zual kan pek theih nana malsawmna tam zawka min vur turin kan la dil ta hram a, kan duham ve thin ngawt mai.

Chuvangin, sawi chiam te, chham duah te hi a ni ber lo. Miin Pathian hmaa a rilru tak tak a bun chhuak ngat a nih chuan sawi tur a van pharh mai a, chham tur a tawi tak a, a sawi chhun erawh a tak a ni. A aw ki sang lo mah se tihderna leh lemchanna tel hlek loa thinlung chhungril atanga tawngtaina chuan Pathian lalthutthleng a nghawr che thin. Chhiahkhawntu mi sual pakhat chuan sual nih a in hria a, a inthiamlo em em a, sim a duh a, a zak ru ngawih ngawih a, hawi pawh hawi chhuak ngam loin a awm a chum a, zawitein, ama hriat tawk lekin, “Lalpa, misual ka ni,” a ti a, a bak sawi tur a hre lo. Mahse, thinlung chhungril atanga irhchhuak chu tawngtaina tawi te chuan thu tam tak a sawi a, chunglam khian a bengkhawn lo thei lo a ni.

Kan naupan laiin kan khuaah naupang pual Gospel camping an buatsaih a, a khaw naupang zawng zawng kan lut a, Kohhran nu hoin Atta an kang a, chhunah thingpui thlum nen ngat kan ei a. Keini thingtlang naupang, hmuihmer ei tur nei zen zen lo tan chuan chu ngawt pawh chu camping luhna tham a ni. Tlai lamah chuan phulah min thingthittir a, min tawngtaitir ta chiam mai a. Counsellor-te chuan kuang vuakfung an keng a, an tei fua fua a, tawngtai zawi deuhte chu, “Ring takin” an ti a, an vaw lawlh lawlh mai a, Pathian hlauh vang pawh ni lo, counsellor-te vuak hlauh vang khan aw rawl tawp tawpin, awr phiar tawng tawngin kan tawngtai ta a ni. ‘A ring a piang chhandam an ni ang’ tih ang maiin kan inbeih rinsiak a ni ber e.

Tun thleng pawh hian tawngtai rin hi kan la uar hle mai a, gospel camping-ah hnehna kan puang a, chung lamah ban kan phar a, ring takin kan tawngtai chuah chuah thin. Setana hi auh zam theih chu nise, kan hnehna puan thawmah leh kan tawngtai thawmah hi chuan zam ve hle tawh tur chu a ni. Mahse, khaw lian bawhbel zawn ang maia ri hulh hulha kan tawngtai te leh kan hnehna puan zozai te hian Setana hi a tizam lutuk lo a ni mai, kum tin Gospel Camping hmanga kan in-recharge ziah a tul tho mai. Kum tira kan camping chuan kum tawpah kan da a, kum tawpa kan camping chuan kum laihawlah kan da leh a, lungphur thleng tlang hel ang maiin kan kalna ngaiah kan kual kan kual mai niin a lang.

Huhoa ring taka tawngtai thin te ai chuan pindan chhungril atanga zawitea chunglam thleng phaka tawngtai thin te hi he hnam tan hian an hlu zawk fo thin.

Share now