Sakhaw hrang hrang- Hinduism te, Jainism te, Buddhism leh Christian sakhua te zirtirna pawimawh tak pakhat chu Law of Karma chungchang hi a ni. Law of Karma awmzia chu a tawi thei ang bera kan sawi chuan ‘Tuh rah seng’ tihna a ni. Miin thil tha a tih chuan a thil tha tih lawmman chu a hmu ang a, thil sual a tih erawh chuan a thil sual tih man chu a hmu bawk ang tih a ni tawp mai. Chu chu Christian sakhua chang ni lo, sakhaw dang tam tak zirtir dan pawh a ni. 

Kan ramah hian eirukna a hluar hle mai a, eirukna avanga hmasawnna kal muan zia te, project lian tham tak tak pam tul a tam dan te, politician te an hausak thur thur dan te, hlawh phu loa sawrkar hnathawk khawsa thei an tam dan te, tun thleng pawha kan mamawh zualpui- kawlphetha leh ei leh barah pawh kan la intodelh loh zia te ngaihtuah hian thin a rim fo thin. Kan hmasawn loh em em chhan hi sum awm loh vang a ni lo va, tute emaw eiruk thin vang a ni.

Sawrkar sum eiru tun tuna, in leh lo ropui tak dina, huan lo ram nei thluaha, duhna apianga fate dah theite hi a chang chuan awhawmin an lang thin. Amaherawhchu, heng mite hian chung lam thinurna erawh an la tawng baw ngei ngei dawn. Chu thil chu nipui khawlum a kian hunah thlasik khaw vawt a lo thleng dawn a ni tih tluka chiang a ni. A tak takah chuan mi pamham te leh eiruk chingte nawmsakna hian chhuan khat pawh a daih mang ngai lo. An thlahte thlengin an ral riai riai a, an ral thum nge nge thin. Chu chu an chunga chunglam rorel dan a ni tlat.

Chuvangin, eiruk ching te, kut tling loa sum la lut thin te hi a tak takah chuan an awh awm miah lo. An thlahte thleng pawha anchhiain a umzui turte an ni. Sual hi Pathianin a hua a, sual rau rauah retheite chanai chhuhsaka kuttlingloa sum la lut thinte chuan an la dam lai ngeiin he leiah ngei hian chung lam thungrulhna an hmu dawn tlat a ni. (Jeremia 17:11)

Hei vang tak hian sum thianghlim lo lak luh that lohzia te, a pawi thui theihziate hi chhungkuaah nasa leh zuala kan inzirtir a tul a ni. Kan fate pawh ei ruk ching fate kawm lo tur te, thiana siam lo tur te, an puitlin hunah pawh ngaihzawng lo tura kan fuih a tha khawp mai. Ho mai maiin lang mah se hetianga kan zirtir hian kan fate thinlungah sual huatna kan tuh tihna a ni nghal bawk ang. Pathian anchhia tawng baw tur tih chiang sate leh an thlahte nena in kutsuih a, thisen inzawm hi ka hlauh zawng tak a ni. Hma lam hun chu ka sawi thei lo nachungin, ka fate hian ka thu an awih chhung chuan ka remtihna chuan engtikah mah khehpuama inhmanhnawihte leh eiruk ching thlahte nen chuan ka suih zawm ngai lo ang. Ral riai riai turte nena ‘tiam tlat e’ tih chu a risk a sang em mai. Kan hrilh chung chung pawha an tawn tlang lui a nih erawh chuan an thu nise.

Eirute hian lei lam rorelnaah thiam an chang a ni thei e, chung lam rorelna erawh engti kawng mahin an pum pelh lo ang. Eiruk chingte hian ram leh hnam pawi an khawih a, a tawpkhawkah chuan an mahni leh an tu leh fate pawi an khawih a, an lu chungah an kan ralna tur meiling an chhek khawl a ni zawk.

Tin, in leh lo thuah te hlei hlei hian duham loh tur. Kan ta tur chu a lo awm ve mai a ni. Leilung hi Pathian siam a ni a, Pathian ta a ni. Kan luah sen loh khawpa tam ram neih vak hi a sawng sawhlawt lo, tul loa rilru hahna mai a ni. Ram neih tam avanga hlim ta em em sawi tur an vang khawp mai. Ram inchuh avanga intibuai leh rilru hah erawh an tam khawp mai. In hmun inchuha unau inkhing ta uaih uaih pawh an awm fo bawk.

Khaw tin leh veng tinah hian mi huam hap, ramri sawn ching, thenawmte leh vangtlang ram nek ching hi an awm deuh vek mai. Heng mite hi an inthlahchhawng duh phian leh nghal. Mahse, hetianga thenawmte leh vantlang ram nek chingte hi khaw khat parawn an vang khawp mai. An fate pawh an ding chhuak mawh khawp mai bawk. Heng mite hi khawtlanga pa awm thei pawl pawh an ni mang ngai lo.

Tin, thenawmte nek tung tung te, vangtlang dip zawnga insakte hi kan pi leh pute khan an duh ngai lo. Lo ri kham kawih tak ngial pawh an duh lo a, hrisel lohnaah an ngai a ni. Ramri sawn ngat phei chu thihnaah an ngai tawp mai a ni. Huan mawng tawlh chu nu thihnaah an ngai a, lo mawng tawlh chu pa thihnaah an ngai hmiah mai. Tin, mual dung zui zawnga in sak te, kawn khara in sak te hi thiang loah an ngai bawk. Kan pi leh pute thurochhiah hi tun thleng pawh hian a la dik (relevant) a sin. Pi leh pute zirtirna tam tak kha Bible zirtirna nen pawh a inhne rem thlap mai bawk. Kan pi leh puten ramri sawn an duh ngai lo a, Pathian pawhin thenawmte nena kan ramri hi sawn a phal miah lo. (Deuteronomy 19:14)
    Chuvangin, he khawvel ram zauah hian mi duham chu lo duham zel se, mi pamham chu lo pamham zel se, eiruk ching chuan eiru tun tun se, engtikah emaw chuan he khawvelah la la hian an thil tih man chu an la hmu ngei dawn si a. (As the Law of Karma says, “Everyone is the maker of his own destiny’’)