Canada sipaiah tangin Major Wes Bower-a chuan khawvel hmun hrang hrang a tlawh a.  Airforce pilot kum 20 chhung niin Gulf indonaah a tel a, UN headquarters Somalia-ah staff officer a ni tawh a, Lebanon, Israel leh Syria-ah te UN remna sipai a lo ni tawh bawk. Chung zawng zawng karah chuan remna sipai atangin remna Lal fapa hna a thawk zui a. 

    Kristian nu leh pa kara seilian ka ni a, mahse, Isua zuina kawnga mahnia thu tihtluk a tul chang erawh chuan kawng awlsam ka zawng mai thin. Vanram kaina tur chauhva ringtu ka ni. Pathian nena kan inlaichinna lam chu ka ngai pawimawh lem lo. Lal Isua chu ka nuna lal ber a ni hran lo. A zualzapui vaihlen hlo an tih ang maiin, ka nu leh pa min zirtirna ni lo lam hawi zawngin ke ka pen hla tual tual a. 
    
    Vanneihthlak takin, ka bo thui zel hma chuan kristian nula nupuiah ka nei ta hlauhva. Mahse, lehkha ka han zir zel a, hna te ka thawh ve takah chuan Pathian ka theihnghilh zui ta a ni. Ka zirlai ka zawhah a bul tan nan zirtirtu hna ka thawk a, mahse, zin veivah te leh thil danglam deuh han tih chakna chuan min nawr a, 1973 ah Canada sipaiah lutin, pilot hna ka training ta a ni.
    Kum 3 zet pilot hna ka thawh hnuah chuan ka nun her danglam bawih tu dang ka tawng leh a, hemi tum erawh hi chuan a nghawng zui chu chatuan daih a ni ta thung. 
    
    Thlawh kual hunbi pangngai tum khat chu, Ontario khaw kiang hmun tlawhpawh ngai loh takah hian ka thlawk a, khaw awm dan chu inthlak danglamin rang taka ka helicopter khalh lai chu leia tum vat a tul tih ka hria. Mahse, tlangin a hual vel ruamah chhum chhah tak leh ruah sur karah ka tang ti tih ta a. Ka helicopter khalh mek chu khawchhe hnuaia thlawk tura thuam a nih loh avangin lei lam hmu thei renga awm a tul hle. Thil kalhmang ti khirhkhan zual turin khaw eng a reh tial tial a, tum maina tur hmun remchang ka hmu bawk si lo! 
    
    Heti hian ka ngaihtuah a, "He hmunah hian thi mai thei dinhmunah ka ding a ni." Chatuan atanga pen khat leka awm mek niin ka inhria a. Ka nun lah chu Pathian tawka, a hmaa ding a, mahni chanchin sawi turin a la inpeih lo nasa mai si! A tawpah erawh Pathianah chauh ka innghat ta a. 
    
    Nunin chhin a tawh laiin chu ngaihtuahna chu a lo thleng thin. Chu helicopter te takte a keimah chauha ka thlawh lai chuan, ka nun her danglam vek tur thutlukna ka siam ta a ni. Ka hun tawn mek chu Pathian kutah hlanin, ka nun emaw thih emaw chu a thu a ni a, ring takin ka tawngtai ta a. 
    
    "Lalpa, ka tana tha tur thil dil ngam tur che ka ni lo tih ka hria. Mahse, vawi khat hun remchang min pe leh a, hmun him a thlawh chhuahna kawng min kawhhmuh a nih ngai chuan, i kaihhruaina kawng zawh turin ka intiam e"
    
    Pathianin ka tawngtaina a hria a, ka intiamnaa ka din ngheh dan tur fiahna hun min pe ta a. Thawklehkhatah hrilhfiah thiam rual lohvin ka thlaphanna a kiang a, A kuta ka nun ka hlan avang chuan ka thla a muang ta em em mai a ni. Chu tlang kar ruama ka thlawh kual ka thlawh kual lai chuan, hmun pakhat thim nasa lo lai ka hmu fuh ta hlauh a, engtin tin emawni chu lam pan chuan ka thlawk thei ta a. 
    
    Tlang kar ruam atang chuan thlawk chhuakin farm pakhat kiangah ka tum thei ta a. Ka tum fel ruala thil pahnih ka tih chu: Ka nunna min chhanhim avangin Pathian hnenah lawmthu ka sawi phawt a, a dawtah a laka ka thutiam tihhlawhtling thei tura a tanpuina ka dil bawk. Khami ni atang khan ka nun a inthlak danglam chho zel a, rinnaah pawh ka thang chho ve ta zel a ni.