Tun thla tir khan National AIDS Control Organization (NACO) buatsaih National Workshop on Harm Reduction leh Prison Intervention, New Delhi-ah hotute duhsakna dawngin ka zuk tel ve a. Hemi tum hian NACO-in state hrang hranga HIV darh dan endikna an buatsaih HIV Sentinel Surveillance (HSS) 2017 report chu an tlangzarh a. Mizoram chu India ram state-ah mipui awm zat atanga tehin HIV tamna ber state kan ni der mai. He tehna an hman hi Antenatal Clinic (ANC), nu naupai lai zinga HIV+ tam dan atangin a ni. Chu mai chu a la ni lo va, drugs inchiu thin zingah leh hmeichhia mahni inzuar (KS tiin sawi mai ila) zingah phei chuan kan sang fal nalh bawk.

He zirchianna HSS hi an neih/kalpui dan a scientific hle a. Drugs inchiu thin (Injecting Drug User-IDU) zinga zir chian dan hi lo sawi ta ila - ka thawhna NGO SHALOM chu Aizawl chhunga IDU cover turin min thlang a. Kan client cover list atangin an duh duh an thlang a, mi 250 thisen sample lak tur a ni a. Chung blood sample te chu hetah test lovin a test-na hmun bik an ruat hmun dangah thawn leh an ni a, chumi result chu tuna HSS 2017 hi a ni ta a ni. “Result sang kan duh vangin kan ti tam a ni lo maw?” tih tawngkam hriat tur a awm fo mai…… kan duh avanga tam emaw tlem emaw thei a ni lo, tihdanglam (tamper) ngaihna a awm ngang lo! He result hi kan pawm phawt a ngai a ni.

HIV&AIDS natna hi kan buaipui rei tawh hle mai, sum pawh kan seng hnem, tha pawh kan thawh nasa; mahse, kan la hneh ngang lo a ni. Mipui ngaihdan thenkhatah phei chuan a field-a thawkte hian sum an duh vangin data te hi an titam a ni lo maw lo ti tawk pawh an awm. Mahse, sawi tak angin HSS result hi a daw thei tlat si lo va, kan nihna dik tak a ni a, kan pawm a, kan ziaawm theihna tura hmalak dan kan ngaihtuahho a ngai a ni.

Engvangin nge HIV+ hi kan tam? Natna inkaichhawn theih (infectious/ communicable disease) reng reng control tur chuan ngaih pawimawh hmasak ngaite chu a vei te hriat chhuah thuai a, mi dangin an kai hmaa enkawlna pek a, mi dang kai darh lo tura venhim a ni. Damdawi hmanga enkawl dam theih a nih chuan enkawl thuai te, invenna damdawi (vaccine) a awm chuan a la vei ve lote vaccine pek vat te; tin, a vei mekte chu a tul anga dah hran (Quarantine) te a ni bawk. HIV inkaidarh dan hi kan hriat angin invenna tel lova sex hman atang te leh, drugs inchiu thinten an inchiuna hmanrua an intawm atangin ani deuh ber a. HIV+ kan tam chhan chu drugs inchiu kan tam a, mipat hmeichhiatna hman kawngah kan inthlahdah a, sex hmang tam zawkin invenna kan ngaihthah vang a ni.

HIV laka mipuite veng tura hmalakna hi kan nei tha tawk lo em ni? Mizoram State AIDS Control Society (MSACS) hian district hrang hrangah NGO 30 chuang thawhpuiin, target bik neiin hmalakna an kalpui a. IDU target-tute chuan an cover theih drugs inchiute chu syringe an inhman tawm loh nan an hman hnu a tharin an thlengsak a (syringe exchange), a mamawh tan condom a thlawnin an pe a, awlsam zawka syringe leh condom pek chhuahna hmun Secondary Distribution site te an siam a, chuta tang chuan condom leh syringe te hi a thlawnin duh hun hunah a lam theih bawk a. Female Sex Worker cover-tute pawhin an client te chu condom an tlakchham loh nan an umzui a, an pe reng bawk. Heng client hrang hrang an contact theihte hi kum khat chhungin an thisen vawi 2 an test-sak ziah bawk a. HIV+ an hriat chhuah apiang chu ART center-ah hruai turin hma an la a, a rang lamin ART enkawlna an pe tan bawk. Hei bak tihbelh tul apiang chu hma an la nghal zel bawk. Hmalakna chu kan nei chhe hauh lo; mahse, kan control hneh tlat lo.

Ruihhlo hmansual - kan buaina pakhat. Ruihhlo hi kan buaipui rei ta viau a, kan ziaawm hlei thei lo. Tuna inchiu nana an hman common ber chu Heroin a ni. Inchiu tam zawk hi ruihhlo an tih tanna tam ber chu vaihlo leh trip (cannabis) te an ni a, hei bakah hian pills leh khuh damdawi pawh a common viau. Heng ruihhlote hi Soft Drugs kan ti nangin ruihhlo hlauhawm zawk, Hard Drugs-a hruai luttu (gateway drugs) an ni a, kan fate/naute'n an ti thin a nih chuan kan ngai serious hle tur a ni. Tin, tun hnaia zirchianna atanga a lan danah chuan kum 19 bawr vel hi drugs inchiu a an pakai hun tam ber ani. Drugs inchiu tir te hi a tam zawk chu an thiante kawhhmuh leh chiu sak an ni a, syringe hman tawm a common hle. A ngawl an vei tawh hnuah pawh NGO te hi an pan lawk duh lova, laklawh an nei ngun a, syringe an lo intawm fo hman a, NGO an rawn thlen meuh chuan HIV an lo kai hman leh mai thin. He ruihhlo hmansual hi kan do dawn anih chuan chhungkua, khawtlang leh kohhran te hian NGO hmalakna hi an support that a ngai hle. Ruihhlo inchiu kan hriat apiang chu NGO hnenah kan hruai thlen zung zung a tul hle.

Sex hman inthlahdah leh invenna ngaihthah - kan buaina dang. Sex education hi kan fate, duhthusam ah phei chuan middle school level atang hian mumal taka kan zirtir a ngai tawh. Tleirawl inngaizawng tam zawk hian sex hman mai hi a pawina an hre vak tawh lo. Pawi zawk erawh chu inngaizawng sex hmangte hian invenna (condom) hman hi inrinhlelhna anga an ngaih avangin an hmang duh tlat lo. Civil Hospital ICTC (HIV Test-na) Counselor sawi danin tleirawl an lo dawnsawn te an han kawm hian condom chu drugs inchiu thin emaw sex lama inthlahdah deuh an hriat chian te sex an hmanpui dawn chauha hman tulah an ngai, an ngaihzawng (regular partner) te nen chuan hman tul an ti lo tlangpui an ti. Heng tleirawlho sex hmangte hian HIV aiin rai an hlau zawk. Khawtlang leh kohhran lama inhman hian HIV lakah kan him tur ang deuh ngaihna kan nei ni te pawhin a lang. Invenna lo kawl remchang si lo, laklawh vanga sex hmang HIV kai leh si hi an awm nawlh nawlh mai. Mipa leh mipa inkawpte kan pung zel nen, HIV kai pawh an tam telh telh ngei ang.

A thuphung hian HIV&AIDS chungchang hi chu kan hre viau a, mahse kan nungchang leh tihdan phung (behaviour) thlak danglam khawpin kan thu hriatte kan nunah kan seng lut leh si lo lai tak hi a buaithlak a ni. Kan rama kohhran lian ber Synod rorel chuan HIV&AIDS buaipui turin thutlukna a siam ta a, a lawmawm khawp mai. A thawk mekte nena thawhhona tha an buatsaih hi a pawimawh khawp mai a, NGO te tlakchhamna lai an thawm thatpui a, service awm ang te ti changtlung tura ruahmanna an siam theih phawt chuan hma kan sawn ngei a rinawm. YMA lam pawh hian NGO te hi ruihhlo do kawngah thawhpui dan mumal tak nei thei se, department pawimawh tak Health, Social Welfare leh Home Dept te thleng hian HIV&AIDS lama thawktute nen thawkho tha thei se, HIV&AIDS lama kan dinhmun chhe ang reng tak mai hi kan ti ziaawm thei ngeiin ka ring. Ruihhlo leh sex chungchang hi remchangah kan la ziak leh dawn nia.

Krismas leh Kumthar chibai vek ule.