Mizorama Building kan neih zinga lian  leh tha ber ber te hi Biak In an ni a. Sawrkar Building tha ve pangngai tak hmun hrang hrangah a awm bawk a. Chungte chu Damdawi In te, Hall te, leh Training Centre te leh Pisa te an ni tlangpui a. Mimal hmun hmâ, Home leh Centre te, Damdawi In te pawh an ni. Tin, mimal in tha pui pui hmun tin, hmun tangah a awm mek bawk. Kumtinin Building thar a pung bawk. Chhungkaw tam ber rilru chu In tha tak neih hi a ni kan ti thei âwm e . 

Biak In sakna atan hian Kohhran ho te  hi an inseng so nasa hle a. Kumtin Annual Budget hrawl tak tak an siam a. Kohhranin kumtin target an intuk mawh hek lova. Cheng nuai tel tak meuh kumtin Biak In sak nan kan seng. A ropui e, a tha e. Lal ber chenna In a ni! Heng Biak In ropuite hi nuam tâwlna tur a ni lova, inchhêk âr bâwmna hmun tur a ni hek lo. Biak In  chu Pathian Kohhran mite inpawl khawmna leh Pathian chibai bukna hmun a ni. Heng Biak Inah te hi Pathian mite chuan an thlarau nun hahchawlh nan an hmang thin tur a ni a. Nun tui hâlten tui nung an hmuhna hmun tur a ni. An thlarau nunna chaw an lamna tur a ni a. Chu hmun chu a thianghlim a, serh hran a ni. 

Keini Kristiante hian kan Biak bûkte hi kan ngai pawimawh em em a ni. Sum sen kan hreh lova, kan neih chuang a liam pawh pêk kan hreh lo. Kan neih bâk bâkin Biak buk kan puah thin a. Biak In tha leh nalh, Biak buk lian leh ropui chuan kan ngaih a ti tha a ni. Kohhranin sum a neih loh pawhin bâ thlau tal pawhin tawngtaina nen sum kan ngaihtuah a, Bank loan kan la deuh vek hial âwm e. 

Biak Inte chu khaw lian leh tê, kilkhawr deuh a mi pawh a nalhin a mawi a. Ringtute Pathian Biak Bûk, ni âwm renga mawi a ni e. Biak In tha leh ropui neih chu inelna rilru pu lo chung pawhin el nei sa ang hrimin kan uluk hle thin zawng a nih hi. 

Khawvela Biak In mawi ber leh lian ber te, khawvelah Biak Bûk chhe ber leh chhuanawm lo berte thil tum chu inang reng leh thu hmun zik tluak a ni a. Pathian biak leh chibai  buk bakah ringtute inpawlhona a ni. Ringtute thlarau nun chaw lâkna hmun a ni a. Zah tak leh hlim tak a kan inpawlhona  hmun a ni. Chuvangin keini Kristian te tan hian kan Biak In te hi a hlu em em a, heng avang tak hian Biak buk sak nan sum kan seng nasa hle a ni. 

Heng Sam 122-na, 100-na, 84-nate leh Bihle hmun hrang hrangahte hian Temple-te hi Pathian mite  khan an ngaihluin an zah hle.Sam ziaktu phei hi chuan Biak In hung chhung ringawt pawh a thlahlel a, a chauh phah hial tih thu a puang chhuak nghe nghe a ni. Lal Davida pawh khan a fapain a thihsan khan i dawn kun mai lovin Pathian Biak buk chu tlai ah a pan a, a Pathian a bia tih kan hria a ni. Sam ziaktu chuan hmun danga ni sangkhat awm aiin Pathian biak in hung chhunga ni khat awm pawh a thlan zawk hial thu Sam 84-naah khan a sawi bawk. Pathian mite hian Biak In hlut zia an hria a, an thlahlel ngawih ngawih a nih hi! 

Amaherawhchu, Biak Ina kan ngaina lo ta tial tial tialin inkhawm kan tlem ta telh telh niin thil chîk mite chuan an hria a ni. Pathian Biak In hnu chhan chak lutuk hi kan mithiam te hian an vei ngang a ni ang e. Zawh loh pawhin an sawi chhuak ta phawng phawng mai! lnkhawm tlem rawtna pawh Kohhran Rorelnaa agenda lian a ni tan ta mek. Biak In kal kan tlem tulh tulh tihte hi a takin a thleng a nih hi! Kan hmalam a eng mawlh lo! Inkhawm zat percentage phei chu hriat ngam pawh a ni tawh lo. 

Mizo Kristian te hi kan inngaihtuah harh a hun ta hle. Inkhawm kan tlem tulh tulh tih hi a dik a nih ngai chuan inkhawm uar leh ngai pawimawh thar tura tan kan lak thara, kan in fuih thar tul ta tak zet zet e. Saprama Biak In tha pui pui ruak  hiau huau thawm kan hriat te hian min tiharh se, kan ti a nih hi! Kohhran a awm chhung chuan Biak In hi a awm dawn! Chu In chu kan damna a ni, ngaina tur kan ni. I Berampute thu sawi I ngaithla dawn a ni ngawt lo. Pathian chibai bukin a thu i ngaithla dawn chauh a ni tih hria ang che. Kan thlarau tan Biak Buk hi Jakoba tuichhun chhuah aiin a hlu fê zawk a ni.