Min tawk zawnga lo kal mi pakhat chu ka zawn a lo thlenin ka su her lawih a, "Awh..ka tihpalh," ka ti a, ani pawhin, "Kei pawh ka tihpalh a ni, ka hmu miah lo che alawm mawle," a ti ve bawk a. Kan pahnih chuan phung kan thlu dun hle, 'A nih leh aw' tiin kan inthlah a. 

Inah erawh thawnthu a dang daih thin. Kan chenpuite, a puia pangin, kan dawr dan a danglam fo.
    
Khami ni tlai lamah khan, rawngbawla ka vir buai laiin, ka fapa, mipa naupang chu ngawi rengin ka hnungah a lo ding a, ka inher pah chuan ka su thlu thelh a. "Chetna dalin lo awm mah ta che," tiin ka vin tuarh a. Lungni lo zetin a kal kiang a.

Eng ti fakauvi'n nge ka lo vin ka hre lo, khuma mu a ka la men kar lai chuan, Pathian aw zawitein a lo thleng a, heti hian a sawi, "I hmelhriat loh bulah phung i thluk hle laiin i chhungkua, i hmangaihte lakah erawh an i cheh lawi si, kal la, choka kawngka bul chhuatah khan, pangpar i va hmu ang, i tana a rawn lak a nih saw, a senno, a eng leh a dumpawl, ama kut ngeia a lak an ni asin. I hriat lohva thawn thut che a duh avanga lo ding ngawi reng a ni. A mita mittui tling piau kha i hmu reng reng lo.

Ka insitin, ka inthiam lo ngawih ngawih a, ka mittui a tla ta hial. Ngawi rengin a khum kiangah ka va thingthi a, 
    "Harh teh harh teh ka naute" ka va ti a. 
    "Heng pangparte hi ka tana i thliah em ni?" 

Hlim hmel takin, "Thingkung bulah ka hmu a, nangmah ang bawka mawi an nih avangin ka thliak alawm"
    "Mawi i ti dawn tih ka hria a, abikin a dumpawl hi"
    "Ka fapa, vawiina ka khawsazia kha pawi ka ti takzet" ka ti a.
    "Khatia vin tur che kha ka ni lo"
    "Ka nu pawi ti suh, ka hmangaih tho tho che alawm" 
    "Ka fapa, kei pawhin ka hmangaih che, pangpar pawh hi mawi ka ti hle, a bikin a dumpawl hi" ka ti a.

CHHUNGKUA
    
Kan hriat reng tur chu, naktukah lo thi ta la, i hnathawhnate khan ni rei lote emaw, kar hnih khat chhungin i aiawh tur an ruai fel leh nghal ang, mahse, kan kalsan, kan chhungte min uina leh ngaihna erawh dam chhung daih a ni thung ang. Ngaihtuah chianin, chhungkua aiin kan hna kan dah pawimawh fo, hmalam hun atana inbuatsaihna atthlak tak a lo ni!