Kulikawn tlak lam (Reiek tlang ep) saw Khasi Veng tih thin a ni. Hmanlai 1930 velte chuan Khasi, lung chher thiam (cement work) a chhung chungin an khawsa - U Mera te, U SIta te, Haha an tih thinte chu ka hria. Mission Venga kan inpui bula tuikhuah tun thlenga la awm khi U Sita min siamsak a ni.

Thakthing veng tia kan sawi tak ber hi Rahsi Veng tih a ni thin (Circle Interpreter hi Rahshi (Chaprashi) tia koh thin an ni). An sawi hmangin Bawrhsap chuan koh an awlsam zawk nan tiin Rahsi 5/6 emaw a kawmchar - tuna Venghluiah hian a dah a ni awm e. Mahse, sawrkhar hna thawk an lo nia, silaite leiin, a thlang chite lui kama Sakhi/Sanghal te chu kapin, a lu an lâm a, tlang an tlir dur dur fo mai a ni awm a. A dahtu ngei Bawrhsap chuan a ning leh si a; chuvangin, tuna Thakthing veng kan tih takah sawn a sawn fai ta lêng a ni an ti. Tichuan, an chhuahsan tak veng chu Rahsi Venghlui tih a lo ni ta a, hun kal zelah Rahsi chu sawi tel loin Venghlui kan ti ta a ni.

Saw Thakthing Veng kan tih tak saw, a tir tak chuan Rahsiho dahna a nih avangin Rahsi Veng tih a ni zawk a, a hnuaia veng saw Rahsi Venghnuai tih a ni thin. Mualpui saw loa an neih lai 1935/36 thlengte khan Venghnuai saw Di in vek a la nih avangin Mualpui lo halin a kang ang tih hlauin, lo hal ni chuan tuium nen in chungah kan ding ve thin. Kei pawh naupang tê ni chungin, ka thian Rinthanga (Sapthlenga) pute in chungah tuium nen ka ding ve thin! Kang tehreng se ka tlaktlai awm lo!

Hmanlai Rahsiho kha an pui awm teh a nia. Bawrhsapin Rahsi zawng zawngin Diary an nei tur a ni tiin Engagement Pad hi a pe a ni awm a, kan Pu Suakhnuna chuan... MONDAY Vawiinah pisa ka kai, a tul apiang ka ti. A hnuai TUESDAY ------do------, A hnuai WEDNESDAY -----do------ tiin hapta kar tluan chuan a lo ziak thin a. Thla tawpah Bawrhsapin a endik thut mai a. Pu Suakhnuna chu a ko a, a hau deuh a, “I hnathawh ziakna tur alawm,” tiin. Pu Suakhnuna chu a lo diau der lo mai a, “Ka pu, khati ang zungpui hmet lekah patling nileng hna thawh a leng lo, kha khan a fun kim ber a ni,” a ti mauh mai a. Bawrhsap chuan, “I hna ziak sen loh chu sawi rawh,” a tia. Ani chuan, “‘Rahsi, Buchhawna ko rawh.’ Ka lo thleng chauh a, ‘Rahsi, Bazarah va kal la, Zungtawia dawrhah a bain Grand National Cigarette bawm hnih va la rawh.’ Ka lo thleng chauh a, ‘Rahsi, Head Clerk ko rawh.’ Ka lo thleng chauh a, ‘Rahsi, Banglaah i pi thingpui zuk la rawh.’ Ka lo thleng chauh a, ‘Rahsi, Buchhawna ko rawh.’ Heti nileng hian min vir buaitir a, ziak len chi a ni lo.” Bawrhsap chuan, “Diary tha ber, a frame siamula, Pisa bangah tar rawh u,” a ti zuk tia.