Hawrawp ziaha tui

Ramthar véng atanga Bazar Búngkàwna Modern English School ka kal lai khán, signboard-a dàwr hming, artist thiam tak tak, Biakrema te, Biaklâra te, Tlângrokhûma te leh artist dang dang ziah kha ka va en chîk thìn tak! An ziah lai ka hmuh fuh cháng phei chuan, nilénga an kianga thut ve ka châk ngawih ngawih thìn. Hawrawp hrang hrang an hman te kha mitthlaa dah thain, ka ziaklohbuah ka hming leh subject hming te kha ka ziah ráng ve riai ruai thìn a.

Ka tána thil làwmawm êm êm mai chu, kan Sir Robin-a’n (Mizo idol/ex-Besy Choir) class àwla hawrawp ziah mawi dàn (lettering & calligraphy) min zirtír thìn kha a ni. Vawiin thleng hian khâng a thil min zirtír thin kha ka la hmang tangkai ve reng a. Ka hawrawp a máwi ta viau e chu ka ti lo a; Bible Society leh Leprosy certificate vêl ziah a ngaih cháng hi chuan kut chu a kham ve duh viau! (Hehehe!)

Chutianga ka lo tuipui ber thin hmang chuan banner te kha kan siam zui ve thìn a. |huthmun pindan zau laiah tin-bow puan (emaw ni?) phah duaiin, hawrawp rem ngìl nán kháwl la kan han pawt a. Kan lehkhabu neih chhah ber ber leh thutthleng kè-te hmangin puan kan delh bet a. Kan puan phahah ngei mai chuan kan hawrawp ziah chawp kan cheh lehho kha Fevicol-in kan chàr ta thìn a. Inkhâwmpui nikhua te kha chuan, pawimawh ve veu veu tak kha kan ni thìn!

Hun a liam zêl a. Computer kan beng hriat hnu lawkah kan hmél hriat zui a. Khatia computer room-a pheikhawk phelha kan luh lai huna ka hmuh châk ber thin chu, computer-a hawrawp hrang hrang (typefaces/fonts) an chhu chhuak lai kha a ni!

E khai! Thu hmaah ka tui dáwn. Ka pèn thui hmain logo lamah lût ang.

Company logo

Nimin piah zàn khán, ka mut hmunah, company logo hrang hrang ka mitthla zut zut pek a! Company-in logo an neihna chhan ber chu, mipuiin awlsam taka an company leh an thil siam an hriat hran thuai theih nán a ni ber àwm e. Ka ngaihtuahna luh ta ber zâwka chu, graphic designer thiam ber ber ruai thei khawpa company lian leh hausate hian, engati nge logo design ho leh mäwlmang (simple) tak, design chei chuai awm lo, an logo lem pawh entawn kher ngai loa ziah chhàwn awlsam tak tùrte hi company logo-a an hman tlat thin le, tih hi a ni.

Google logo te, Apple te, Nike, Amazon, Baskin Robins, Toyota, FedEx … a dang dangte logo han en hian, a holam riau zêl mai a. Chutih laiin, keini ram rethei leh pachhe fé zâwka awmten, logo leh watermark mawi leh dangdai, har pui pui, kï-kàwi zet zet kan hman thinna chhan te hi ka ngaihtuah zui neuh neuh a; a chhan tak pawh chu ka hre chuang lo a!

Nimin khán, hun äwl ka neih vêleh Google lamah ka zawng ta a. Khawvêl huapa company lianho hian, an logo phènah hian thil tam tak an lo phúm ru thìn tih te ka hre chhuak ve chauh a! Tûn tumah chuan, kan logo tàr chhuah chauh khi sawi ta ila, kan hriat làr sa an ni tho bawk a.

Thurûk thuhrûk!

America rama truck leh thlawhna hmangtea lehkha leh bungraw phurtu lian, FedEx company hian chutin logo an nei hran lëm lo. An company hming an ring nghâl mai a—ho ka ti angreng riau a! Mahse, FedEx tih inziak hi ngun taka kan en chian chuan, “E” leh “x” inkárah hian fei (arrow) a lo awm reng mai! “Chak zâwk leh rang zâwkin i bungrua kan thawnsak thei che,” tih thurûk an lo thukru reng a lo ni a!

Toyota logo te hi a mâwlmang fú. “T” siam nána an hman oval shape invuak thuahte hi ngun takin han en la; “Toyota” tih ziahna hawrawp mal a kim vek asin!

Aizáwlah pawh kan lo ei phâk ni ve ta, ice cream company lâr Baskin Robbins logo te hi han en chiang ila … Flavour hrang hrang an siam chhuah zât inziak hi kan hmu thiam em le? An logo-a “B” leh “R” ziah nán “3” leh “1” an hman hi!

Khawvêla cycle intlân thuisiak hmanga intihsiakna ngaihhlut, Tour De France logo te hi ka lo hmu thiam ngai rëng rëng lo a; ho hi ka’n ti thìn khawp a! “Tour” tiha “R” hi thirsakawr khalhtu (cyclist) lem a lo nih reng hi! “O” leh rawng enga bial hi cycle ke lem an nih rualin, rawng eng hi ní (sun) lem a ni nghâl bawk. Ní-in a entír chu: intihsiakna hi ni èn lai, chhùn êngah an nei thìn, tih a ni bawk.

Hmul mehna company lian Gillette logo te hi … an razor kan lei hma hauhin “Gillette” ziah nána an hawrawp hman pahnih, “G” leh “i” te hi, an blade hriam hian a lo zai sa dèr tawh a nih hi maw le a!

Ràl-chah dàwr lian ber Amazon logo te hi tu’n kan hai lo ang! Amazon inziahna hnuaia fei ang deuha kual hi en ta i la, “A” atanga intanin “Z”-ah a tàwp a; tin, a nui sáng bawk! He logo an hman chhan chu, “Eng thil pawh—A atanga Z thleng kan zuar vek a, nangni leh keini làwm nán kan rawn thawn thei reng che,” tihna mai a ni!

Nike’s Swoosh

Khawvêla infiamna lam thawmhnaw siamtu lian, Nike-in an logo, “Smoosh” an hman tan dàn te hi a ngaihnawm riau. An logo hi kum 1971 atanga an hman tan tawh niin, Portland State University-a graphic design zir lai, Carolyn Davidson-i duan chhuah a ni. 

Nike co-founder Phil Knight leh a thianpa, Bill Bowerman te kha he University-ah hian zirtírtu an ni thìn. Bill kha track coach lär niin Phil kha Accounting subject-a Associate professor a ni. An pahnih hian, intlànisiaknaa bun chi pheikhawk thar siam tumin hma an la mék a. An thil siam chhuah tum hmingah chuan, Greek thawnthua hnehna lalnu (queen of victory) “Nike” tih an vuah a. A logo design dàn tùrah pawh—Adidas logo ang lo tak, thil che (motion) lantírna leh, hnehna chan tuma tumruhna nèna theihtawp chhuah tih lantír thei tùr an duh a ni.

Zir lai tleiräwl, Carolyn Davidson chuan, ‘Sikul hall-a ka awm laiin Phil Knight hian min rawn kal pèl thuak a. Sum lama kan harsat vànga oil painting ka zir theih loh thu ka thiante ka hrilh lai tak a ni a. Ani chuan darkár khata dollar 2.5 hlawha thil design tùr min kawhhmuh a. Darkár 17 chuang ka thawk ta a, Swoosh hi ka duang chhuak ta a ni,’ a ti. Carolyn hian Swoosh a design manah hian dollar 35 chauh zu hlawh a! Mahse, kum 1983 khán Nike hotute chuan an logo, Swoosh design-tu chawimàwina hun hi an hmang leh a. Hemi tum hian Carolyn Davidson hnênah company share 500 leh rangkachaka siam Swoosh zungbun an pe leh a ni.

Apple keih hêk hi le!

Apple Inc. ten an logo-a apple keih hêk lem an hman hian ngaih dàn hrang hrang a pian chhuahtír tam hle. Eden huana Evi leh Adama te ei, an mit ti vártu thei rah kha apple nia ngaihna pawh a lian hle. Kum 1976-a Steve Jobs leh Steve Wozniak ten, vawiina techno­logy company giant ni ta Apple Inc. an din lai khán, Steve Jobs khân thlai hel leh thei rah chauh châwah a ring tan a; apple chu a ngainat ber leh a ei nasat ber a ni. |um khat chu, apple huan pakhat a tlawh hnu lawkah, a thianpa Wozniak hnênah an company hming atána “Apple” hman a rawt a; anni’n lo remtihpuiin an hmang ta mai a ni.

An logo hmasa ber—apple kûng hnuaia Isaac Newton-a’n lehkhabu a chhiar lai lem chu kum 1976-ah an company third co-founder, Ronald Wayne-a’n a duang a. A kum leh, 1977-ah Steve Jobs chuan, dollar nuai khatin designer Rob Janoff a ruai a; vawiin thlenga an hman zui tâk an logo hi a duang chhuak ve leh a; ‘Cheery nèna miin an hriat pawlh loh nán,’ tiin a design-tu Rob chuan keih hêk a nih chhan hi a sawi.

Keimahni logo

Heti hian ka ngaihtuah zui ta daih a: “Ka hming hi ka company hming ni ta se … ka hming an lam rual hian, miten engtin nge ka company, keimah hi min ngaih anga, eng tin nge min sawi zui ang? Eng ti mi nge nia min hriat ang? Company rin tlâkah min ngai ang em? Ka hming an lama ka hmél an mitthla zui rualin, eng ang mize pú mi nge ka niha an hriat ang? Eng ang logo nge an mitthla zui ve ang? Ka túm bur lai leh ka thinur lai hmél an hmu ang em?—chhiat tawh nâka lai hian …” tih hi!

Ni e, mi tin hian logo hran theuh kan nei a; ni tin kan khawsakpui leh kan kianga awm tam ber te, kan thawhpui te, kan thenawm leh kan thian thate hian kan rawng, kan logo dik tak chu an hre chiang ber ang. Chûng mite chuan mi dangte hnênah, eng ang rawng/logo pu nge kan ni tih an sawi thin ang? Kan logo màwi leh màwi loh chu, mite min thlìr dàna innghat tùr a ni ang.

He leia mihring piang tawh zínga sawisèl bo awmchhun, Isua Krista khân ni tin zan tina amah hnaih reng thìntu, a zirtírte kiangah khán, ‘Miten Mihring Fapa hi tu nge a ni an tih?’ tih zawhna a zâwt ngam tlat! Keiniho hian min hre chiang bertute hnênah hian, he zawhna hi kan zâwt ve ngam ang em? A nih leh, kan beng hian a chhànna dik tak  a ngaithla ngam ang em?

Kan ni tin nun dàn, kan khawsak dàn, kan ngaih pawimawh ber, kan tìti duh záwng leh kan buaipui berte hian, mi dang mita kan logo màwi leh màwi loh chu a hril mai a lo ni. A design-tu awmchhun chu—keimahni chauh kan ni!

Eng logo nge i nunah miin an hmuh ve le?