Tun hma deuha tawngkam kan hman uar deuh chu, ‘kan ti nek nek a, bar thla kan lo chuang kai dawn ta reng mai mai’ tih kha a ni. Chutiang deuh chuan, kan ti nek nek a, India ramah chuan dan thar kan hmang dawn ta reng mai. 

Khawvel hi chu a zau em em a, mihring pawh kan tam a, kan ngaihven zawng leh kan hriat zawng pawh thil inpersan tak tak a ni. World Cup kan tih mai, football hmanga khawvel ramte inelna sang ber hi khawvela thil hmuhnawm chhuah ropui ber ‘The Greatest show on Earth’ tiin an sawi thin a. Kum 1994-a khawvela ram ropui ber USA-in a thlen tum khan, a ram mi thahnem tak chuan World Cup an thleng tih an hre reng reng lo an ti, tak tak ni maw? 

Tunah pawh he dan thar hmang tur hian sawrkar chu a inbuatsaih mup mup a. Mizoram sawrkar pawhin State Level Steering Committee a din a, Nodal Department atan Home Department a ruat bawk a. Sawrkara thuneitute pawh vawi duai lo an thukhawm tawh nghe nghe a ni. Chuti chung chuan dan thar kan hman dawn tih hre reng reng lo an lo awm thei tho, an demawm miah si lo. Chuvang chuan, dan thar kan hman tur chungchang hi tawi tein sawi zau kan tum dawn a ni. 

Indian Penal Code, 1860 chu Bharatiya Nyaya Sanhita, 2023-in a thlak dawn a. Code of Criminal Procedure, 1973 chu Bharatiya Nagarik Suraksha Sanhita, 2023-in a thlak dawn a. Indian Evidence Act, 1872 chu Bharatiya Sakshya Adhiniyam, 2023-in a thlak dawn a ni. 

Heng dan tharte hi eng nge a nih chiah a, eng thu nge a pai a, eng lam hawi nge a nih tih kan hre chak fur mai thei e. Mahse, tun tumah chuan kan sawi rih lo ang a. A aiah heng danten an thlak tur dan kan hman mekte hi kan sawi hlauh thung ang. A chhan chu, kan dan hman mekte hi kan hriat chian chuan dan thar hman tur hi kan hre nghal kuar dawn a ni.  

A chunga kan sawi tawh angin, tuna dan thar kan hman tur hian Indian Penal Code te, Criminal Code of Procedure te leh Indian Evidence Act te a thlak dawn tih kan hre tawh a. Heng dan bu thumte hi criminal law a ni. India ramah hian criminal law tam tak a awm a. Bible-ah zawlnei te leh zawlnei lian an awm ang deuh hian, criminal law leh civil law-te hi dan lian (major) leh dan te (minor) tiin an then ve tho a. Heng dan bu thumte hi dan bu lian (major criminal law) a ni. 

Criminal law te hi duan chhuah a nih chhan chu, dan bawhchhetute hrem an nih theih nan leh khawtlangah sualna (crime) leh dan palzamna (lawlessness) lo awm tur ven nan a ni.  

Indian Penal Code hian sual awmzia leh a hremna a sawi a. Rukruk te, pawngsual te, tualthah te leh sualna chi hrang hrang awmzia a hrilhfiah. Mi kut tuara thih theihna a tam hle. Tun lai hian thian dun inkap palh an awm fo a. Lirtheiin mihring a chil hlum fo bawk. Intihbuai avanga kut tuara thi an awm. A chang chuan tum reng vanga inthahna pawh a thleng thin. IPC hian murder awmzia hi fiah takin a sawi a, mi kut tuara thi zawng zawng hi murder a ni kher lo. Mizoin pawngsual kan tih leh IPC-in pawngsual a tih hi a inang lo ve khawp mai. Tin, sualna (offence) tinah hian hremna pek theih zat tur a inziak hrang thliah thliah vek a ni. 

Dan bawhchhiahna lo thleng ta se, dan anga hmalak dan tur kawngkal (procedure) felfai tak a awm a ngai a. FIR thehluh dan te, dan bawhchhetu nia puh (accused) man dan te, jail tan tir dan te, thubuai chhui (investigation) dan te, thuhretu thu zawh dan leh a thil hriat chhinchhiah dan zawng zawng hi Criminal Code of Procedure-ah chipchiar takin a inziak ve leh thung a ni. 

Court-ah mi an inkhin chuan thu inchuh an nei tihna a ni. Ramri nia pawm chin a inang lo fo a. Nupa inthenin fa enkawl leh changtu zawk nih an tum ve ve tlat chuan inkhin a tul lo thei lo. Hmeichhiain pawngsual ngei nia a inhriat laiin a puh pa chu a tang ve tlat thei. A khingtuin a khinna a mi khinin a pawm chuan a fel a ni mai a. Thu inchuh a awm erawh chuan finfiah­na (evidence) a tul thin a. Court-in finfiahna a lak dan tur leh inkhingten finfiahna an tihte pawm theih a nih leh nih loh chungchang hi Indian Evidence Act-ah hian fel fai takin a inziak ve thung a ni. 

Dan hman mek kan sawi fiahna atanga chiang tak kan hriat nghal theih chu, dan thar hi Uniform Civil Code a ni lo tih hi a ni. Dan zirna huangah hian personal law an tih hi a awm a. He dan hi hman lai dante anga hnam tih dan (custom) leh sakhuana (religion)-a innghat a ni deuh ber a, sakhaw hrang leh hnam hrang tan inhman tawm chi a ni lo. Chuvang chuan, Hindu personal law a awm a, Muslim personal law a awm a, Christian personal law a awm. He dan hian inneih leh inthen dan te, chawmna inpek dan te, fa enkawltu leh a changtu tur ruat dan te, ro khawm dan ang chi te hi a huam ber. Heng personal law te hi anmahni kuang theuha tluang takin, insu buai loin a luang dam dam vek a ni. Mahse, heng anmahni kuang theuha luangte hi lai pawpin inluan fin ta se, Uniform Civil Code a lo chang dawn ta a ni. Hnam bilin hnam dan an neihte chu hman zui a ni tawh lo ang.  

He dan thar hi civil law a ni lo tih kan hre nghal thei bawk ang. Tu emaw hnenah, ‘District Court-ah kal la, thubuai hrang hrang ngaihtuah laite chu criminal a nih loh chuan civil a ni ang’ han tingawt ila, dan zir ve lo tan chuan a fiah chuang lo. Heti hian han sawi chhin ila. District Court-ah hian court pahnih a awm a, chungte chu civil court leh criminal court te a ni. Civil Court-ah chuan civil law hmangin thubuai hi ngaihtuah leh chin fel a ni thin. Civil Judge (Jr. Div.) te, Civil Judge (Sr. Div.) te,  Addl. District Judge te leh District Judge te hi civil court a ni. Ba inthinna te, fa inchuh te, ramri buai te leh rokhawmtu nemnghehna ang chi hi civil case a ni. 

Tichuan, dan thar kan hman tur hi Uniform Civil Code emaw civil law emaw a ni lo tih kan hre thei awm e. 

Indian Penal Code, 1860 te, Code of Criminal Procedure, 1973 leh Indian Evidence Act, 1872 hi criminal law a nih avangin, a thlaktu tur Bharatiya Nyaya Sanhita, 2023 te, Bharatiya Nagarik Suraksha Sanhita, 2023 leh Bharatiya Sakshya Adhiniyam, 2023 te hi criminal law a ni kan hre thei nghal mai ang. Chutih laiin dan thar hi a thar biai tur tihna a ni lo a. A hming hi an thlak hlak a ni mai a. A bu chhung thu (provision) hi chu a danglam lutuk lo niin mithiamte chuan an sawi. 

He dan hi India ram pumah July ni 1, 2024 atanga hman tan tur a ni ang.