— LALTHLAMUANA RALTE Party tharlam tak AAP-in Delhi khawpui inthlana hnehna mak tak leh ropui tak an chan thu hi nakin thlenga titi tui tling tur a ni. Seat 70 awmah seat 67 zet laktir thei khawpa mipui an inthurual thei hi a ropui a, nikum lawka mualpho Kejriwal-a thli na takin a tleh thut mai hi a mak tel bawk. India politics inlumlet ngaihven thin tan mai bakah vai ram politics ral thlir satliah keini Mizote tan pawh hian a ngaihnawm riau a ni. Nikum hmasa kum tawp lam atanga nikum kum tir lam ni 49 chhung lek Congress thlawpin AAP hi Delhi-ah an sorkar a. Thla khat chuang awrh chhung chuan sorkar kalphung danglam tak mai an lantir hman a; mahse, an tum anga eiruk dona dan an siam theih tak loh avangin sorkar an nam thlu thut a, Delhi mipuiten an dem phah hle a. Sorkar inrelbawlna lam (Governance) thiam lo a puh an ni a, an hotupa Kejriwal phei chu sorkar dodala buaina chawhchhuah ching (Anarchist) ang hialin an chhuah a nih kha. Chumi hnuah Parliament inthlanpuiah khan seat 400 chuang zet an chuh ve a. Punjab-ah seat 4 chu la ve mahse, an mualpho chiang hle. AAP candidate zinga 90%-in an dahkham an chawi hial a. Delhi-ah phei chuan seat awm zawng zawng BJP-in hui fai vek a. Chuta tang chuan AAP hi zuih ral mai tur leh politics thlanmualah vui liam ni nghal mai turah an ngai hial a. Mahse, chu party chu a tlukna atangin a lo tho chhuak leh a, an tihsual tawhte an zir chiang a, an fel lohna leh an chak lohna laiah an insiam tha a. Tichuan, nikum June thla vel atang khan an inbuatsaih tan a, Delhi khawpui lak let leh tumin tha thlah miah loin an tang mar pat a, a tawpah hnehna namen lo an chang ta hial a ni. Delhi khawpuiah hian an party hi an tlahniam hman hle a. Aam Aadmi Party thupuangtu Ashutosh sawi dan chuan, ni 49 chhung chauh an sorkar avang khan Delhi mipuiin bumtu ang hialah an ngai a, an lakah an lungawi lo tih an hria a. Mipui rilru tuam dam chu hna pawimawh berah an nei a, Kejriwal-a'n a thusawina apiangah inngaitlawm takin ngaihdam a dil ta ziah a, an term zawh hmain banna theh luh a tum tawh loh thu pawh a puang zel bawk a. Lehkhathiam chinin sorkar kalphung hre lo leh mipui fuihpawrh a lungawi lohna lantir a punkhawm huaihawt hrat takah an ngaih avangin nasa takin an inenlet a. Kalphung thar tur an buaipui a, mipui nen sorkar hmalak dan tur leh Delhi hmasawnna turte an sawiho bawk a. Kejriwal hi corruption haw tak, mi dik leh rinawm a ni tih hi tuman an hai lo a, ngaihsan a hlawhna ber pawh hei hi a ni. AAP hruaitu pakhat chuan, “Kan rinawmna hi mipuiin min zui chhan lian ber a ni. Chumi dawtah chuan kan thutiam kan lo tihhlawhtlin tawh vang hi a ni ang a, a thlawna tui pek leh, electric hman man tihtlem leh corruption tihtawp kan tiam vang hi a ni bawk ang,” a ti. Mi mal inbeih ang chi hi an elpui party-ten an uar hle a. Prime Minister meuh pawhin, buaina siam ching a nih avangin sorkar laka hel Naxal-ho zawm rawh se, ti hialin a bei a. Mahse, a mi mal a an beihrawn luai luai avang leh tha taka a chhan let nghal zat zel avang hian mi rilruah an tlak nat phah daih niin an sawi. AAP chak chhan bulpui pakhat an sawi chu party mi inpe tak tak an tam vang a ni. Volunteer 35,000 atanga 40,000 inkar vel an awm a, an thawh tur leh an mawhphurhna chiang takin an hrilh hre sa vek bawk a. Inthlan puan chiah atang khan an hmang tangkai ta reng bawk a ni. Mipui an hip chhan lian tak pakhat chu an manifesto hi niin an sawi bawk. Chanchinbu mi lo ni tawh Ashish Khetan te hoin uluk taka an buatsaih AAP inthlan manifesto hi mipui mamawh ber ber, an hriatthiam theih tura ziah a nih avangin miten an bawh phah a, ram an lak phah hle a ni. Ziaktu pakhat chuan mi rethei zawkte tana duhthlan tur awm chhun anga an in tawktarh thiam hi a ni an chak chhan lian tak niin a sawi a. Party lian zawkten hun rei tak chhung thuneihna an lo kalpui tawh dana lungawi lo, politician leh thiltitheite laka hel ru, hlemhletna avanga tuar, eirukna phoro chak tak tak leh kalphung thar duh ngawih ngawihten an bawh nasa a. Chungte chuan AAP hmangin an tih theih an lan chhuahtir ta a ni. Mizo zingah pawh hetianga politics chhe chi duh tawh lo, ram hmasawnna him leh tlo duh em em, eirukna haw tak tak an tam tawh a. Mahse, inrelbawlna tha lo sawisel a, thuneihna hmang dik lo thinte do ngam leh kalphung tha zawk kawhhmuh thei tur leh mipui rilru chawk tho thei, ram leh hnam tana huaisen taka lo pen chhuak hi an la awm chiah lo niin a lang. Mizoramin harsatna a tawk mek tih hi kan hre theuh ang. Hlemhletna a hluarzia hi phat rual a ni lo a, politics tawp zia lah kan hre vek bawk. Hman atangin politician-te vangin kalphung (system) tha lo tak tak nghet em em lawi si kan la zui reng a. Chu system avang chuan insawipui hnam anga min chhal te, compensation hnam anga min sawi te an awm ta hial a ni. Lalna leh thuneihna inchuh vangin politics a tawp zo a, politician-te pawhin hnung lama nuih tet tet an tawh phah a. Chutiang karah chuan kan politician neih sate bak thlan tur an awm chuan loh avangin mi tam tak an beidawng tan mek a ni. Leh lamah chuan ram tana pen chhuah tuma insang phek an awm ve pawhin sihal putar rual mi fing tak takte hian an chhaih rawn a, politics thli chhiain a len bo leh mai thin. Kohhran hrang hrangte leh MPF hmalakna avangin inthlan boruak muanawm tak kan nei thin chungin sum leh pai, therhlo an chelek nasa tho a nih hi. Hetia, India ram khawpui ber, politics hmunpui ni bawk, thiltithei ber berte awmna leh mithiam rual infawkkhawmna hmun a mi satliahte tangrualin thil ropui tak an tih theih chuan kan ram tan pawh beiseina a thar ngei ang.