Gen Z hi tunlaiah chuan Social Media (Electronic & Print Media) khawvelah kan hriat lâr pawl leh kan hmuh zin pawl an ni awm e. Heng ho hi kum 1997-2012 inkara piang te an ni hlawm a,  tunlaia 'thalai/thangthar' kan tih, kum 28 atanga 13 inkar, khawvel la hmachhawn chauh tur thil hlui leh thar inthlak thleng laia piang, saptawng takin 'Digital World',  tem chho an ni a. Tleirawl/Rawlthar nun an hmang chho a, Social Media khawvelah an cheng zui a, a lovin an awm thei tawh lo. Gen Z hi  Digital Culture sulsutu an ni a, Digital tih hian mihringte hnathawh ti awlsam tura khawl thluak nei heng (Social Media, E-Books, Website etc) hi a huam vek a ni. Gen Z (1997-2012) inkara piangte chu Generation Alpha (2013 - 2024) inkarah an rawn seilian chho leh nghal a, Gen-Alpha khawvelah chuan thil a awlsam tawhin Smart Media khawvelah Artificial Intelligence thiamna pianpui an ni nghal a, chhuan dang zawng aiin Gen Z te hi chhuan vannei ber an ni ang lawi a,  khawvelin hma a sawn zel a, inkalpawhna leh inbiakpawhnaah thiamna hmang tangkaiin awlsam takin thil a tih zung zung theih tawh. 

Changkanna thlipuiin min nuai a, thil lem (artificial) leh materialism-ah kan intlansiak a, sum kan hma chhuan a, zirna lam leh eizawnna atan a lo tangkai bawk si a, awlsamna in min chiah hneh tawh em avangin dawhtheihna kan tlachham a, thil nih tir zung zung kan tum a, hei hian thatchhiatna a hring reng bawk a. Gen Z te khawvelah kan cheng chho a, insiamrem harsa ti fe fe pawh kan awm bawk ang. Khawvel changkanna in zual lam a pan zel a, sualna pawh a pung ve zel. Tun hmaa zahthlak kha a zahthlak tawh loh a, thiangzauna lamah kan sâng a, kan kal filawr ta hle. Hetiang karah hian kan hriatreng tur chu khawthlang mite nun dân ang diak diak hian keini hi kan nung ve thei lo tih hi kan hriat tur chu a ni. 

Kan ram thenawm Nepal buainaah pawh a tha thawh hnem leh huai taka che chhuak ho kha (Gen-Z) tleirawl/rawlthar rual an ni a, Digital khawvel pianpui a tawng chho an nih miau avangin an buaina chhan pakhat leh thalaite an thinrim a zual chhan ber ni a, an sawi chu Internet hmanga thalai ten nuam ti taka khawvel nun an hmanna (Electronics Media) Facebook Whatsapp leh a dang te tih tawp sak an nihna kha a bulpui ber a ni awm e. E-Media-ah kan chen tawh avangin an thalai tam takin tih tawp sak an ni hian hre thiam thei lo a ni. Politics thila an lungawilohna pawh kha a chhan pakhat a ni a, an buaina ti zualtu ber erawh thalaite khawvel chenna ber tih tawp sak an nih kha a ni.  A hunah chuan an tangrual thiam a, an ngaihdan sawh sawn sak an har hle a, dik chu dik, dik lo chu dik lo tia pawm tlattu thalai an ni. A ngen kawngah chuan ngeng tak an ni a, thil tha lam a nih erawh chuan inlungrual taka thil ti ho leh dial dial thei an ni thung. Nepal buaina atang khân a hriat theih mai awm e, kha buaina avanga an sulhnu zawng zawng kha then fai hna an thawk leh tih kan hmuh kha. 

Kan ramah pawh Internet thil tih theihna hian min rûn nasa tawh hle mai a, a bikin thalaite hi min rûn nasa zual hle niin a hriat. Nu leh Pa ten kan thlir liam mai hi a tawk tawh lo. Kan enpui peih a, a hman tawk dan thiam turin kan thalai rualte hi kan kawm tlang nel thiamin kan kawm thiam a pawimawh hle a, pawng tawng khap sak ringawt hian thil tha lo zawk leh pawi zawk a thlen thei tih kan hriat a tul tak zet a ni. Kan tu leh fate tuipui hi hriatpuiin, khuah khirh leh khap sak an ngaih hunah pawh  kan lo in veng lawk thei phah dâwn a ni. 

Tunlai khawvelah hian Gen Z te hian nghawng an neih len chhoh zel avangin thil inthlak danglamna siamtu an ni tih a chiang hle. Mi thenkhatin Soft Generation an lo ti pawh hi a dik nachen a awm a, changkanna pianpui chhuanthar an ni a, thil an duh tui a, inthlak danglamna hriltu an ni a,  kan hmalam hun thlir zel ila, tunlai thangtharte duhthusam leh an hlutna hi hriatthiam pui a, an khawvela cheng thiam ve turin inzir ve zel hi kan tum tur a ni. An ngaihhlut thil hlut pui thiam leh thlawp thiam a pawimawh a, an theihna hman leh chhawr tangkai dân zawng ila, a tha lai pawm sak a, a chhe lai thlak tura fuihtu leh ti phurtu kan ni thei tih hriain Gen-Z, Gen-Alpha & Beta te khawvel hman chhoh turah hian sawisel a, diriamtu nih ai chuan venpuitu kan ni tih i hre thar ang u.