Tunlai hian "Duhlian" tih hi Mizo tawng sawi nan tak kan in sawi hmuh a, ril deuh riau na ah kan ngai nge maw ni, Mizo Tawng tih mai turah "Duhlian tawng" te kan han ti deuh kher zel a. Thenkhat lahin Duhlian Lal tih te, Duhlian hnam tih te thlengin an zeldin thutak bawl rawl nen. Duhlian tih hian enge awmzia a neih? Kum 1984 khan Vanapa Hall-ah DUHLIAN tih sawi hona (Seminar) neih a nih khan Zoram dung leh vanga Upa thil hre mi a ngaih te sawmkhawm an ni a, khang hunlaia kum 70-80 ho kha chu tunlai angah chuan la dam hlawm se kum za chuang fe an in bangliam vek tawh ang. 

Mizo culture lam rawngkai hriatna lamah hian aia upa ringawt hian an hre chuang lo, Upa ah pawh a hre mi hetiang lam ngaihven mi hi an awm a nia. He Seminar a lo kal khawm ho hi a hremi kan tih ang ho kha an ni vek kha a nia, naupang te pawh hetiang lam ngaihvena in zirmi an nih chuan kan hnam Culture hi tuna Upa kum 70 chuang ho ai hian an hriatna a ril zawk daih thei leh bawk awm e. Tin, kan sakhaw puithiam te leh kohhran Upa te chen hian kan hnam culture bengkhawn lohna kal zel hian hmun a la luah reng zawng a nih ber hi, Mizo Culture hre tak nih kha Berampu tan chuan in remlo tlata hriatna kan la nei a nih tlat hi maw.

Duhlian tih hming awmzia leh a lo chhuahna tih vel kha khata kal khawm ho khan an bangbo hlawm hle a, thu tlukna tak tak kha neih theih pawh a ni lo, ui benga hlin ngheh tum ang mai kha a ni ber. Duhlian tih hming hi tun hmain Chhingchhip a veng pakhat hi "Duhlian veng" tih a ni awm e, tih kha Duhlian tih hming lanna an sawi theih chu a ni deuh mai awm a. Lal ho lal hunlaia Lal leh mual kil Upa ho kha an khua leh tui ten an hriat loha sawi nan "Duhlian ho" tiin an sawi thin tih kha thutlukna ber leh an \in pui tak chu a ni mai awm e. Mizo te hian mi an hriat lem loha an hming lo phuah hi kan hrat hle zawng a ni, an mahni in an hriat loha mihring hming sawi nan te, hnam ang te pawhin hming hi kan phuah zel zul mai thin a nih hi maw.

Kan Pi leh Pu te kha tawngkam te hi an fimkhur thei em em a. Sakei hi an zah a, an ngai thupui hle, a hming pawh hi ramhnuai ah chuan an lam mai mai ngai lo, "Bengtawia" te an ti mai thin. Fanai ho phei kha chuan an zah zual a, miin Keipui an kah te hian Leikapui tlangsang ah Puandum an zar hial thin. Ni e, ram chhuahna ah Keipui hnai deuha an hriat te khan, "Chu kan hnaihah Duhlian tawng thiamlo a awm a nia" tiin Pasaltha ten an mi hruai te an hrilh mai thin. Hei vang hian a nimaw Mizo tawng chu Duhlian tawng an lo tih tak hlawm ni. Tin, Sakei hian Mihring hi an zah em em a, kah hliam hmasak te an nih ngawt loh chuan mihring hi a seh ngawt lem lo an ti a, sakei ran vulh seh ching te pawh hi, "Sakei tar tawh an chaw pangai pel thei tawh lo an ni e," an ti bawk. 

Kan Pipu hunah khan Sailo Lal ten an khua leh tui te chunga rorel nan Mizo tawng an lo hmang kha hnam in pumkhat nan a lo tha ngiang mai, Sailo khua leh tui te kha Mizo hnam hrang hrang tawng peng hrang nei kha an ni fur a, zawi zawiin Mizo tawng kha hnam pum tawng ah an lo chher chho zel kha a nia, an lo thawk ropui hle mai. Tawng a thuhmun loh chuan hnam inpumkhatna a thleng ngai si lo.